सहसंपादक : रामभाऊ भोयर
शिरभाते यांच्या शेतामध्ये असलेल्या बंड्यात एका कथित धार्मिक कार्यक्रमामुळे कळंब परिसरात खळबळ उडाली आहे. या कार्यक्रमात हिंदू धर्माविषयी आक्षेपार्ह विधानं करण्यात आली असून, समाजात अंधश्रद्धा पसरवून धर्मांतर करण्याचा आरोप स्थानिक हिंदू बांधवांनी केला आहे.
या संदर्भात दिनेश लक्ष्मणराव वानखेडे व सर्व समस्त हिंदू बांधवांनी कळंब पोलीस स्टेशनमध्ये लेखी तक्रार दाखल केली आहे. तक्रारीनुसार, या कार्यक्रमामध्ये उपस्थित व्यक्तींना प्रभू येशूने दिलेले लिक्विड म्हणून काही द्रवपदार्थ देण्यात आले व देवांची प्रार्थना करण्यास सांगण्यात आले. त्यासोबतच हिंदू, मुस्लिम व बौद्ध धर्मातील देव-देवतांबद्दल अनादरजनक वक्तव्य करण्यात आल्याचा आरोप आहे.या कार्यक्रमात विविध प्रकारच्या गोळ्या वितरित करण्यात आल्या व भोळ्या-भाबड्या लोकांना दिशाभूल करत आर्थिक उलाढाल सुद्धा करण्यात आली, असा गंभीर आरोप करण्यात आला आहे. पांढऱ्या पाकिटांमध्ये रोख रक्कम वाटप करत धर्मांतराचे षडयंत्र रचल्याचा दावा तक्रारीत करण्यात आला आहे.
तसेच, स्थानिक पोलीस प्रशासनाची कोणतीही पूर्वपरवानगी न घेता सदर कार्यक्रम पार पाडल्याचेही समोर आले आहे. त्यामुळे कायदेशीर परवानग्यांविना हा कार्यक्रम घेण्यात आल्याने, कायदा व सुव्यवस्थेच्या दृष्टीनेही हे गंभीर प्रकरण मानले जात आहे.तक्रारकर्त्यांनी प्रशासनाकडे मागणी केली आहे की, या प्रकरणाची सखोल चौकशी करून दोषींवर कठोरात कठोर कारवाई करण्यात यावी.
