.]

(प्रतिनिधी) शेख रमजान

अन्न आणि औषध प्रशासन (FDA) आयुक्त तुकाराम मुंडे यांनी अन्नपदार्थांमधील भेसळ आणि प्रतिबंधित गुटखा विक्री करणाऱ्यांविरोधात , थेट ‘मकोका’ (महाराष्ट्र संघटित गुन्हेगारी नियंत्रण कायदा) अंतर्गत कारवाई करण्याचे कडक आदेश दिले आहेत. या कडक आदेशामुळे ढाणकी शहरातील अवैध व्यवसाय करणाऱ्यांमध्ये प्रचंड भीतीचे वातावरण पसरले असून, कारवाईच्या धास्तीने शहरातील पान टप्परी दुकानदारांनी आपली दुकाने बंद ठेवली. मुंडे यांच्या ‘मकोका ‘ च्या इशाऱ्याने भेसळखोर आणि गुटखा विक्रेत्यांचे धाबे दणाणले.
मुंडे यांनी पदभार स्वीकारताच अवैध धंद्यांविरुद्ध आपला मोर्चा वळवला आहे. आरोग्याशी खेळणाऱ्या भेसळखोरांची आणि गुटखा माफियांची गय केली जाणार नाही, असा सज्जड दम त्यांनी दिला आहे. थेट ‘मकोका’ सारख्या कडक कायद्याचा वापर करण्याच्या आदेशामुळे, ढाणकी येथील व्यापाऱ्यांमध्ये घबराट पसरली. अधिकृतपणे व्यवसाय करणाऱ्यांमध्येही संभ्रमाचे वातावरण निर्माण झाल्याने, अनेकांनी खबरदारी म्हणून आपापली दुकाने बंद ठेवणे पसंत केले. गुटखा आणि प्रतिबंधित सुगंधित सुपारीची छुप्या पद्धतीने विक्री करणाऱ्यांचे या आदेशामुळे धाबे दणाणले आहेत. प्रशासनाच्या या आक्रमक पावित्र्यामुळे आगामी काळात ढाणकी परिसरातील अवैध गुटखा विक्री आणि भेसळ संपूर्णपणे मोडीत निघणार का ?
याकडे आता नागरिकांचे लक्ष लागले आहे.