सहसंपादक: रामभाऊ भोयर
तालुक्यातील सावनेर येथे खुलेआम सुरू असलेल्या अवैध दारू विक्रीमुळे गावातील सामाजिक शांतता धोक्यात आली असून अनेक कुटुंबांचे संसार उद्ध्वस्त होत असल्याचा गंभीर आरोप सरपंच, ग्रामपंचायत सदस्य व समस्त गावकरी महिलांनी केला आहे. याबाबत त्यांनी राळेगाव पोलीस स्टेशनचे ठाणेदार यांना सविनय निवेदन सादर करून तात्काळ कारवाईची मागणी केली आहे.
निवेदनात नमूद केल्याप्रमाणे, मौजा सावनेर येथील बसस्थानक परिसरात तसेच वाढोणा बाजार रोडवरील दुकानाजवळ सर्रासपणे अवैध दारू विक्री सुरू आहे. या बेकायदेशीर धंद्यामुळे गावातील अनेक पुरुष व्यसनाधीन झाले असून त्याचा थेट फटका कुटुंबीयांना, विशेषतः महिलांना व लहान मुलांना बसत आहे. काही कुटुंबांची आर्थिक व सामाजिक परिस्थिती अत्यंत बिकट झाली असल्याचेही अर्जात नमूद करण्यात आले आहे.गावाच्या सरपंचांनी सांगितले की, गावातील अनेक महिलांनी दारूविक्री बंद करण्यासाठी आपल्याकडे वारंवार तक्रारी केल्या. त्यानंतर सरपंचांनी स्वतः संबंधित दारू विक्रेत्यांना समज देऊन दारू विक्री बंद करण्याची विनंती केली; मात्र त्यांनी कोणतीही दखल न घेता अवैध व्यवसाय सुरूच ठेवला. यापूर्वीही पोलीस स्टेशनमध्ये तक्रार देण्यात आली असतानाही ठोस कारवाई न झाल्याने ग्रामस्थांमध्ये तीव्र नाराजी पसरली आहे.
अवैध दारू विक्रीमुळे गुन्हेगारी प्रवृत्ती, घरगुती हिंसाचार, आर्थिक गैरव्यवस्था यामध्ये वाढ होत असल्याचे चित्र गावात दिसून येत आहे. त्यामुळे या गंभीर बाबीकडे दुर्लक्ष न करता तात्काळ छापा टाकून अवैध दारू विक्री बंद करण्यात यावी, दोषींवर कडक कारवाई करण्यात यावी, अशी ठाम मागणी अर्जदारांनी केली आहे.
जर लवकरात लवकर योग्य कारवाई झाली नाही, तर ग्रामस्थ व महिलांच्या वतीने तीव्र आंदोलनाचा इशारा देण्यात आला आहे. प्रशासनाने या प्रकरणाची गंभीर दखल घेऊन मौजा सावनेर गावाला अवैध दारूच्या विळख्यातून मुक्त करावे, अशी अपेक्षा व्यक्त करण्यात येत आहे.
