सहसंपादक:प्रशांत बदकी
वाशिम – २२ मे रोजी मालेगाव येथील जेष्ठ विधिज्ञ सुदर्शन गायकवाड यांच्यावर पोलीसांकरवी झालेल्या मारहाणीचा वाशीम जिल्हा विधिज्ञ मंडळाने तीव्र निषेध नोंदविला असून या प्रकरणातील दोषी अधिकार्यांवर त्वरीत कारवाईची मागणी करण्यात आली आहे. जिल्हा विधिज्ञ मंडळाच्या अध्यक्षा अॅड. सौ. छाया मवाळ व सचिव अॅड. नामदेव जुमडे यांच्या नेतृत्वात २४ मे रोजी जिल्हाधिकारी यांच्यामार्फत मुख्यमंत्री, गृहमंत्री, पालकमंत्री, पोलीस महासंचालक, पोलीस महानिरिक्षक, बार कौन्सीलचे राज्यातील पदाधिकारी तथा विरोधी पक्षनेत्यांना निवेदने पाठविण्यात आली. निवेदनावर जिल्हा विधिज्ञ मंडळाच्या पदाधिकार्यांसह जिल्हयातील असंख्य वकील मंडळींच्या सह्या आहेत.
निवेदनात नमूद आहे की, जेष्ठ विधिज्ञ सुदर्शन गायकवाड यांना झालेल्या मारहाणीसंदर्भात २४ मे रोजी जिल्हा विधिज्ञ मंडळाची तातडीची बैठक बोलावून चर्चा करण्यात आली व एकमताने निषेधाचा ठराव पारित करण्यात आला. पोलीस अधिक्षकांच्या ताफ्याला ओव्हरटेक केल्यामुळे साथरोगाचे कारण दाखवून मालेगाव पो.स्टे.चे पोलीस निरिक्षक आधारसिंह सोनुने व इतर आठ ते दहा पोलीस कर्मचार्यांनी पोलीस अधिक्षक व पोलीस निरिक्षक यांच्या सांगण्यावरुन अॅड. सुदर्शन गायकवाड यांच्या घरात जावून त्यांना व त्यांच्या कुटुंबियांंना अमानुष मारहाण केली. एवढेच नव्हे तर त्यांच्याविरुध्द मालेगाव पो.स्टे. मध्ये अपराध क्र. २०३/२०११ अन्वये भांदवी कलम ३५३, ३३२, १८६, २९४, ५०४, १८८, २६९, २७० व ३४ तसेच क्रिमीनल लॉ अमेन्टमेंट अॅक्ट कलम ७ नुसार त्यांच्यावर खोटे गुन्हे नोंदवून कारर्वा करण्यात आली. तसेच त्यांचा स्वत:चा दिलेला रिपोर्ट अधिकार्यांनी फाडून फेकून अर्वाच्य भाषेत शिवीगाळ केली. या घटनेचा वाशीम जिल्हा विधिज्ञ मंडळाच्या वतीने जाहीर निषेध नोंदविण्यात येत आहे. घटनेतील दोषी अधिकार्यांवर तात्काळ निलंबनाची कारवाई करण्यात यावी. तसेच सदर घटनेचा तपास हा सीबीआयकडे किंवा पोलीस महानिरिक्षक यांच्यामार्फत समिती स्थापन करुन करण्यात यावा अशी मागणी दिलेल्या निवेदनाव्दारे करण्यात आली आहे.
