सहसंपादक : रामभाऊ भोयर

तेजणी गावातील ग्रामस्थांनी बस सेवा सुरू करण्याची मागणी केली आहे. गावातील 50 विद्यार्थी सावनेर, राळेगाव, वाडोणा, आणि झाडगाव येथे शिक्षणासाठी नियमित ये-जा करतात. सध्या विद्यार्थ्यांसाठी शाळेत जाण्याकरिता बसची कोणतीही सुविधा उपलब्ध नाही, त्यामुळे त्यांना पायी प्रवास करावा लागत आहे.
यामुळे विद्यार्थ्यांना शिक्षण घेताना विविध समस्यांचा सामना करावा लागत आहे. विशेषतः, परिसरात वाघाच्या दहशतीमुळे विद्यार्थी आणि त्यांच्या पालकांची चिंता वाढली आहे. ग्रामस्थांनी विचारले आहे की, जर कोणताही अनुचित प्रकार घडला तर त्याची जबाबदारी कोण घेणार?
याशिवाय, मुलींवर होणारे अत्याचार पाहून त्यांच्या सुरक्षिततेबद्दल चिंता व्यक्त करण्यात आली आहे. अशा परिस्थितीत, सर्व विद्यार्थ्यांना शाळेत व महाविद्यालयात सुरक्षितपणे पोहोचण्यासाठी बस सेवा सुरू करण्याची तातडीची मागणी ग्रामस्थांनी केली आहे.
गावातील लोकांनी एकत्र येऊन हे निवेदन सादर केले आहे, आणि प्रशासनाने त्वरित उपाययोजना करून बस सेवा उपलब्ध करून द्यावी, अशी त्यांची मागणी आहे.