11 हजार रुपयाची लग्नासाठी देणार मदत

क्रांतिज्योती सावित्री बाई फुले – शुभमंगल कर्तव्य योजना

सहसंपादक : रामभाऊ भोयर

अत्यंत तुटपुंज्या मानधनावर महिला व बालविकासाच्या सेवेत योगदान देणाऱ्या राळेगाव तालुक्यातील अंगणवाडी सेविकासह मदतनीस व आशा सेविकांच्या कुटुंबातील मुलीच्या लग्नाचा काहीसा खर्च सामाजिक कार्यकर्ते राहुल मेश्राम यांनी उचलण्याचा संकल्प केला आहे. त्यातूनच त्यांनी स्त्री शिक्षणाच्या प्रणेत्या क्रांतिज्योती सावित्री बाई फुले – यांच्या नावे
शुभमंगल कर्तव्य योजना. या नावाने राहुल मेश्राम यांनी ही मदतीची योजना राबविण्याचे ठरविले आहे.
आदिवासीबहुल राळेगाव तालुक्यातील समाज जीवन दारिद्र्य, अद्यानं , अंधकारात भरडलेले आहे. त्यातच राहुल मेश्राम यांच्या मातोश्री रेखा मेश्राम (किनाके) यांनीही गरिबीचे चटके भोगून महिला व बालविकासाच्या सेवेत बहुमूल्य योगदान दिले आहे. त्या अंगणवाडी पर्यवेक्षिका म्हणून आजही कार्यरत आहे. एकंदरीत अंगणवाडी सेविकांना अत्यंत तुटपुंजे मानधन मिळते. त्यातून त्यांच्या कुटुंबाचा उदरनिर्वाह चालविणे सुद्धा कठीण आहे. त्यामुळे अनेकदा कुटुंबातील मुलीचे लग्न करताना त्या कुटुंब प्रमुखांना आर्थिक संकटांना तोंड द्यावे लागते. सेविकासह मदतनीस व आशा सेविकांच्या कुटुंबाची अवस्था हीच असते. त्यामुळे रेखा किनाके मेश्राम यांचे सुपुत्र राहुल मेश्राम यांनी गेल्या अनेक वर्षांपासून राळेगाव तालुक्यात चालविलेल्या सामाजिक उपक्रमा मध्ये हा नवा उपक्रम त्यांनी हाथी घेतला आहे. तालुक्यात जवळपास अंगणवाडी सेविकांसह मदतनीस व आशा सेविकांची संख्या ५०० च्या जवळपास आहे. या सर्व सेविकांच्या कुटुंबाला आपले कुटुंब समजून त्यांच्या कुटुंबातील मुलीच्या लग्नासाठी ११ हजाराची आर्थिक मदत देण्याचा संकल्प राहुल मेश्राम यांनी केला आहे.
प्रामुख्याने अंगणवाडी सेविका, मदतनीस व आशा सेविकांची नियुक्ती करतांना विधवा, परित्यक्ता प्रवर्गातील महिलांना शासन प्राधान्य देते. त्यामुळे त्यांची कौटुंबिक स्थिती हलाखीची असते, कुटुंबाची जबाबदारी सांभाळत असतांना उदरनिर्वाहासह मुलांचे शिक्षण, आरोग्यावरील खर्च , घरातील मुलाबाळीचे लग्न ही कर्तव्य पार पाडणे एक दिव्य असते. त्यामुळेच या परिस्थितीची जाणीव असल्याने राहुल मेश्राम यांनी त्यांच्या कुटुंबातील मुलीच्या लग्नासाठी ११ हजाराची आर्थिक मदत देत लग्नाचा आर्थिक भार थोड्या प्रमाणात का होईना कमी करण्याचा प्रयत्न चालविला आहे. राहुल मेश्राम यांनी महिलांच्या आरोग्याची काळजी म्हणून भविष्यात मोफत आरोग्य तपासणी शिबिरे घेण्याचा मानस बोलून दाखविला आहे. त्यांच्या या उपक्रमामुळे राळेगाव तालुक्यातील अनेक अंगणवाडी सेविका, मदतनीस व आशा सेविकांच्या कुटुंबियांना एकप्रकारे हातभार लागणार आहे.