सहसंपादक ::रामभाऊ भोयर
महाराष्ट्र राज्याचे आदिवासी विकास मंत्री श्री. अशोक उईके यांच्या वतीने जीवे मारण्याच्या धमक्या देण्यात आल्याचा गंभीर आरोप अॅड. सिमा एल. तेलंगे यांनी केला आहे. त्यांनी याबाबत सविस्तर माहिती देणारी प्रेसनोट यवतमाळ येथील माध्यम प्रतिनिधींना पाठवली आहे.
अॅड. सिमा तेलंगे यांनी दिलेल्या माहितीनुसार, दि. १७ डिसेंबर २०२५ रोजी त्यांनी ‘बोध टॉक’ या पॉडकास्टवर दिलेल्या मुलाखतीत काही आदिवासी शेतकऱ्यांच्या जमिनी जबरदस्तीने हडप केल्याचा आरोप केला होता. हे प्रकरण न्यायालयात प्रलंबित असतानाच संबंधित मुलाखतीमुळे आदिवासी विकास मंत्री अशोक उईके व्यथित होऊन थेट उत्तर न देता दुसऱ्या व्यक्तीमार्फत जीवे मारण्याच्या धमक्या देत असल्याचा आरोप त्यांनी केला आहे. तसेच त्यांच्या कुटुंबात भीतीचे वातावरण निर्माण करून दहशत पसरवण्याचा प्रयत्न होत असल्याचेही त्यांनी नमूद केले.
प्रेसनोटनुसार, यवतमाळ जिल्ह्यातील राळेगाव तालुक्यातील देवधरी येथील भुरबा कोवे या आदिवासी शेतकऱ्याची जमीन बळकावण्याचा प्रयत्न करण्यात आला. तलाठ्याशी संगनमत करून सदर जमीन स्वतःच्या सुतगिरणीच्या नावावर हस्तगत करण्यात आल्याचा आरोप करण्यात आला आहे. याशिवाय उभ्या पिकात जेसीबी चालवून पीक उद्ध्वस्त करण्यात आले, शेतकऱ्याला मारहाण करण्यात आली आणि त्या ठिकाणी बिरसा सुतगिरणीचे उद्घाटन करण्यात आल्याचे सांगण्यात आले. या घटनेबाबत वडकी पोलीस ठाण्यात तक्रार देण्याचा प्रयत्न केला असता ती नोंदवून घेण्यात आली नाही, असा आरोपही करण्यात आला आहे.
अॅड. तेलंगे यांनी आदिवासी आश्रमशाळांमधील कंत्राटी भरती प्रक्रियेवरही गंभीर आक्षेप नोंदवले आहेत. १ मे २०२५ रोजी काढण्यात आलेल्या शासन निर्णयानुसार बाह्यस्त्रोतामार्फत १७९१ पदांची भरती करण्यात आली. या प्रक्रियेत सुमारे ४५०० अनुभवी कंत्राटी शिक्षकांना कामावरून कमी करण्यात आले. एका खाजगी कंत्राटदार कंपनीमार्फत गैरव्यवहार झाल्याचा तसेच एका आश्रमशाळेत कंत्राटी शिक्षकाकडून मुलींच्या शोषणाची घटना घडल्याचा आरोप त्यांनी केला आहे. तक्रार करूनही सुरुवातीला कारवाई झाली नाही, मात्र सोशल मीडियावर व्हिडीओ व्हायरल झाल्यानंतरच गुन्हा नोंदविण्यात आल्याचे त्यांनी सांगितले.
याशिवाय, आदिवासी विकास मंत्र्यांनी आपल्या पदाचा गैरवापर करून मुलीला मुंबई उच्च न्यायालयात ‘ब’ वर्ग समुपदेशक म्हणून नियुक्ती मिळवून दिल्याचा तसेच यवतमाळ नगरपरिषद निवडणुकीत इतर पात्र कार्यकर्त्यांना डावलून मुलीला अध्यक्षपदाची उमेदवारी मिळवून दिल्याचा आरोपही अॅड. सिमा तेलंगे यांनी केला आहे.
या सर्व प्रकरणांची सखोल चौकशी होऊन दोषींवर कठोर कारवाई करण्यात यावी, अशी मागणी त्यांनी केली आहे.
