वाशीम – अमरावती विभागासह जिल्ह्यातील महिला बचत गटांचा आर्थिक विकास साधण्यासाठी महाराष्ट्र नवनिर्माण सेनेच्या वतीने सुरु करण्यात आलेल्या सौ. शर्मिला राजसाहेब ठाकरे महिला सन्मान योजनेत महिलांनी नोंदणी करण्याचे आवाहन मनसे जनहित कक्षाच्या राज्य उपाध्यक्षा प्रा. संगीता चव्हाण यांनी प्रसिध्दी पत्रकाव्दारे केले आहे.
त्या पुढे म्हणाल्या की, मनसे अध्यक्ष राज ठाकरे यांच्या आर्शिवादाने, जनहित व विधी विभागाचे राज्य अध्यक्ष किशोर शिंदे, सरचिटणीस महेश जोशी यांच्या मार्गदर्शनात व जनहितच्या राज्य उपाध्यक्ष प्रा. संगीता चव्हाण यांच्या संकल्पनेतून तसेच जिल्हा संपर्क नेते विठ्ठल लोखंडकर, जिल्हाध्यक्ष मनीष डांगे, विधी सेलचे जिल्हाध्यक्ष अँड. नामदेव जुमडे यांच्या सहकार्याने ही योजना वाशिम जिल्हा व अमरावती विभागात राबविण्यात येत आहे. या योजना पत्रकाचे २ ऑगष्ट रोजी मुंबई येथे शिवतीर्थ कार्यालयात महाराष्ट्र नवनिर्माण सेना अध्यक्ष राज ठाकरे यांच्या अर्धांगिनी सौ. शर्मिला ठाकरे यांच्या हस्ते लोकार्पण करण्यात आले आहे. या योजनेच्या माध्यमातून महिला सक्षमीकरण व महिला बचत गटांना अनुदान वितरण, बचत गटाचे प्रदर्शन, रोजगार व स्वयंरोजगार प्रशिक्षण शिबिर, बचत गट स्थापन करणे, शालेय शिक्षणाकरीता अनाथ मुली दत्तक घेणे आदी उपक्रम राबविण्यात येणार आहेत. अमरावती विभागासह जिल्हयातील महिला बचत गटांची आर्थिक उन्नती साधून त्यांना विकासाच्या प्रवाहात सामावून घेण्यासाठी सदर योजना सुरु करण्यात आली आहे. या योजनेत महिला बचत गटांनी त्वरीत आपली नोंदणी करावी. नोंदणी व अधिक माहितीसाठी महाराष्ट्र नवनिर्माण सेनेच्या सामान्य रुग्णालयासमोर असलेल्या न. प. संकुलातील राजगर्जना जनसंपर्क कार्यालयात संपर्क साधावा असे आवाहन त्यांनी केले आहे.
