सहसंपादक:प्रशांत विजयराव बदकी
नाल्याची साफसफाई, रस्ते दुरुस्तीसह पोल उभारणीची गरज
महाराष्ट्र नवनिर्माण सेनेचा आंदोलनाचा इशारा
वाशिम – शहरातील अकोला नाकाजवळील आनंदवाडी प्रभागातील नाल्याची साफसफाई, रस्तेदुरुस्ती आदी मुलभुत सुविधा मोडकळीस आल्या आहेत. यासोबतच प्रभागात असलेली हापशीही गेल्या अनेक महिन्यापासून नादुरुस्त अवस्थेत आहेत. प्रभागात ठिकठिकाणी इलेक्ट्रीक पोल उभारण्याची गरज आहे. मात्र नगर परिषद प्रशासनाचे या प्रभागाच्या समस्यांकडे दुर्लक्ष होत असून त्यामुळे नागरीक त्रस्त झाले असून मुलभूत सुविधेअभावी आनंदवाडी प्रभागाचा विकास खुंटला आहे. यासदंर्भात महाराष्ट्र नवनिर्माण सेनेने आंदोलनाचा इशारा दिला असून ९ जून रोजी पक्षाचे प्रभारी जिल्हाध्यक्ष मनिष डांगे यांच्या मार्गदर्शनात मनसे सैनिक प्रतिक कांबळे यांनी नगराध्यक्ष व मुख्याधिकार्‍यांना निवेदन दिले.
निवेदनात नमूद आहे की, शहरातील आनंदवाडी परिसरात रस्ते, नाल्यासह इतर मुलभुत सुविधा मोडकळीस आल्या आहेत. या प्रभागात नगर परिषदेच्या वतीने देण्यात आलेली हापशी अनेक महिन्यापासून नादुरुस्त आहे. त्यामुळे सध्या उन्हाळ्याच्या दिवसामध्ये नागरीकांना पाण्यासाठी इतरत्र भटकावे लागत आहे. प्रभागात अनेक ठिकाणचे रस्ते नादुरुस्त आहेत. सदर रस्त्यावर ठिकठिकाणी मोठमोठे खड्डे पडले आहेत. त्यामुळे या रस्त्यावरुन चालतांना नागरीकांना त्रास होत आहे. त्यामुळे सदर रस्त्यांची त्वरीत दुरुस्ती करणे अतिआवश्यक झाले आहे. यासोबतच प्रभागातील नाल्यांची नगर परिषद आरोग्य विभागाच्या वतीने नियमित साफसफाई केल्या जात नाही. त्यामुळे परिसरामध्ये नाल्यांमध्ये सांडपाणी साचून आरोग्याचा प्रश्न निर्माण झाला आहे. प्रभागात उभारलेले इलेक्ट्रीक पोल अपुरे असून या ठिकाणी अधिक पोल उभारण्याची गरज आहे. या सर्व बाबीची दखल घेवून शहराचे पालक या नात्याने आनंदवाडी परिसरातील रहिवाशांना या मुलभूत सुविधा देणे ही नगर परिषदेची प्रशासकीय जबाबदारी आहे. या समस्येकडून न.प. प्रशासनाचे लक्ष वेधण्यासाठी मनसेच्या वतीने १६ मार्च रोजी निवेदन देण्यात आले होते. परंतु रहिवाशांच्या मागणीकडे न.प. प्रशासनाने दुर्लक्ष केले. त्यामुळे मनसेने पुन्हा निवेदन देवून आनंदवाडी प्रभागातील समस्या दुर कराव्या अन्यथा लोकशाही पध्दतीने आंदोलन पुकारण्यात इशारा निवेदनाव्दारे देण्यात आला आहे.
निवेदन देतांना महाराष्ट्र सैनिक मोहन कोल्हे, गजानन वैरागडे, प्रतिक कांबळे, आनंदवाडी शाखा अध्यक्ष राजु शिराळ, उपाध्यक्ष विनोद सरकटे, सचिव समाधान खरे, संघटक देवा खरे, ज्ञानेश्वर खरे, नितीन कदम, सागर खरे, महेश कदम, समाधान कंकाळ, सुहास जाधव, वेदांत ढवळे, ओंकार राजे, भैया देशमुख आदी उपस्थित होते.
