प्रतिनिधी:शरद तरारे,वणी
वणी: येथील स्वावलंबी शिक्षण संस्था द्वारा संचालित सुशगंगा पब्लिक स्कूलच्या प्रांगणात उडान २०२३ या थीमवर आधारित सांस्कृतिक कार्यक्रमाचे सफल आयोजन गुरुवारी दिनांक १९ जानेवारी रोजी करण्यात आले.
उपरोक्त कार्यक्रमाच्या अध्यक्षस्थानी संस्थाध्यक्ष मा. प्रदिपजी बोनगिरावर तसेच उद्घाटक म्हणून प्रा. डॉ. अनंता सूर आणि विशेष अतिथीस्थानी व्यवस्थापकीय संचालक मा. मोहनजी बोनगिरावर, शाळेचे प्राचार्य मा.प्रवीण दुबे आदी मान्यवर उपस्थित होते. कार्यक्रमाची सुरुवात मान्यवरांच्या हस्ते सरस्वती मातेच्या प्रतिमेचे पूजन व दीपप्रज्वलनाने करण्यात आली.
कार्यक्रमाच्या प्रास्ताविकपर भाषणाद्वारे प्रा. प्रवीण दुबे सर यांनी आपल्या प्रभावी भाषण शैलीत वार्षिक अहवाल सादर करीत विद्यार्थ्यांना मार्गदर्शन केले. आपल्या उद्घाटकीय भाषणाद्वारे डॉ.अनंता सूर यांनी विद्यार्थ्यांना यश आणि अपयश यातील फरक सॉक्रेटिसचे उदाहरण देत अतिशय मार्मिकपणे विषद करीत मार्गदर्शन केले. आपल्या अध्यक्षीय भाषणात संस्थेचे अध्यक्ष मा. प्रदिपजी बोनगिरवर यांनी पालकांशी संवाद साधून विद्यार्थ्यांना कार्यक्रमासाठी शुभेच्छा दिल्या. विद्यार्थ्यांतील सुप्त कलागुणांना वाव देण्यासाठी सांस्कृतिक कार्यक्रमाचे महत्त्व मा. मोहनजी बोनगिरवार यांनी विषद केले. शाळेतील विद्यार्थ्यांनी विविध गाण्यांवर नृत्य सादर करुन सर्व उपस्थित मान्यवरांचे तसेच पालकांचे मन जिंकुन घेतले.
प्रस्तुत कार्यक्रमाचे सूत्रसंचालन व आभार प्रदर्शन इयत्ता ९ वी च्या विद्यार्थिनींनी केले. कार्यक्रमाच्या यशस्वीतेसाठी शिक्षक व शिक्षकेत्तर कर्मचाऱ्यांनी परिश्रम घेतले.
