(प्रतिनिधी) शेख रमजान

उमरखेड तालुक्यातील ग्रामीण भागातील नागरिकांना विविध महसुली व शासकीय सेवा सहज उपलब्ध व्हाव्यात यासाठी विभागीय कार्यालय उमरखेड व तहसिल कार्यालय उमरखेड यांच्या संयुक्त विद्यमाने “शिवाजी महाराज महसूल समाधान शिबिर – टप्पा १” चे आयोजन करण्यात आले आहे. हे विशेष अभियान नागरिकांच्या अडचणी एकाच ठिकाणी सोडविण्याच्या उद्देशाने राबविण्यात येत असून, विविध विभागांच्या सेवा शिबिरस्थळीच उपलब्ध करून दिल्या जाणार आहेत.
हे शिबिर शुक्रवार, दि. ०८ मे २०२६ रोजी उमरखेड मंडळातील बिटरगाव (बु.) येथे आयोजित करण्यात आले आहे. शिबिराचे आयोजन वसंतराव नाईक कृषी माध्यमिक व उच्च माध्यमिक विद्यालय, बिटरगाव (बु.), ता. उमरखेड, जि. यवतमाळ येथे सकाळी ९.०० वाजता करण्यात येणार आहे.
या शिबिरामध्ये महसूल विभागाशी संबंधित अनेक महत्त्वाच्या सेवा उपलब्ध होणार आहेत. प्रलंबित फेरफार प्रकरणे, ७/१२ उताऱ्यातील दुरुस्ती, डिजिटल स्वाक्षरीयुक्त ७/१२ व ८-अ उताऱ्यांचे वाटप, उत्पन्न, रहिवासी व जात प्रमाणपत्र, नॉन-क्रिमीलेअर प्रमाणपत्र, जमीन अभिलेख अद्ययावत करणे, ई-मोजणी अर्ज, तसेच अकृषक (NA) तरतुदींविषयी मार्गदर्शन दिले जाणार आहे.
तसेच तुकडेबंदी कायद्यांतर्गत प्रकरणांचा निपटारा, भूसंपादन व अकृषिक परवानगीसंबंधी माहिती, नवीन व्यवस्थापन सनद, सरकारी योजना व सामाजिक अर्थ योजनांचा लाभ, घरकुलासाठी पट्टे वाटप, पीएम किसान व अ‍ॅग्रीस्टॅक नोंदणीसारख्या सुविधा नागरिकांना मिळणार आहेत.
शिबिरात महसूल विभागासोबत ग्रामपंचायत, पंचायत समिती, आरोग्य विभाग, कृषी विभाग, समाजकल्याण विभाग, दुय्यम निबंधक कार्यालय, भूमिलेख, महिला व वन विभाग, पोलीस विभाग आणि इतर विविध विभागांचे स्टॉल उभारण्यात येणार आहेत.
याशिवाय नागरिकांसाठी रक्तगट तपासणी, बीपी, शुगर परीक्षण, ईसीजी तपासणी या आरोग्य सेवा विनामूल्य उपलब्ध करून देण्यात येणार आहेत. तसेच एस.टी. महामंडळाचे सवलत कार्ड वाटप व शेतकरी संवाद कार्यक्रम देखील आयोजित करण्यात आला आहे.
शिबिराचा लाभ घेण्यासाठी मंडळातील सर्व नागरिकांनी शिबिराच्या दिनांकापूर्वी ग्रामपंचायत अधिकारी किंवा मंडळ अधिकाऱ्यांकडे आवश्यक अर्ज भरून द्यावेत, असे आवाहन प्रशासनाच्या वतीने करण्यात आले आहे. ग्रामीण भागातील नागरिकांनी या शिबिराचा जास्तीत जास्त लाभ घ्यावा, असे आवाहन तहसील प्रशासनाने केले आहे

“ग्रामीण भागातील नागरिकांना महसूल व इतर शासकीय सेवा एकाच ठिकाणी उपलब्ध करून देण्यासाठी ‘शिवाजी महाराज महसूल समाधान शिबिर’ उपयुक्त ठरणार आहे. नागरिकांच्या विविध प्रलंबित कामांचा जलद निपटारा करण्यासाठी प्रशासन कटिबद्ध आहे. शिबिरात महसूल, आरोग्य, कृषी, समाजकल्याण यांसह विविध विभागांच्या सेवा उपलब्ध करून दिल्या जाणार आहेत. विद्यार्थ्यांसाठी जात, उत्पन्न, रहिवासी प्रमाणपत्र, शैक्षणिक कामांसाठी आवश्यक कागदपत्रे तसेच विविध शासकीय योजनांची माहिती उपलब्ध करून दिली जाणार आहे. त्यामुळे विद्यार्थी व पालकांनीही शिबिरात सहभागी होऊन या सुविधांचा लाभ घ्यावा,” अशी प्रतिक्रिया तहसीलदार उमरखेड यांनी दिली

तहसीलदार
राजेश उमरावसिंग सुरडकर उमरखेड