प्रतिनिधी:उमेश पारखी,राजुरा

राजुरा: नाते आपुलकीचे ही संस्था गेल्या दोन वर्षांपासून अविरत अनाथ,अपंग,अपघातग्रस्त,आजारग्रस्त अशा गरजवंतांच्या मदतीला धावून जात आहे.अगदी कमी वेळेत नाव लौकीकास आलेली ही संस्था आपल्या निरपेक्ष वृत्तीने आणि पारदर्शक कारभाराने समाजमनावर नाव बिंबविण्यात यशस्वी ठरली,कोणत्याही प्रसिद्धीच्या जाळ्यात न पडता संस्थेच्या 305 सदस्यांच्या सामूहिक मदतीने निराश्रित, गरजवंतांच्या चेहऱ्यावर हसू फुलविण्याचे काम ही संस्था आजघडीला अविरत करत आहे.
मु. पापटखुटी,त.कारंजा,जि. वाशीम येथील श्री.गणेशजी निघोन्ट यांच्या 7 वर्षाचा मुलगा महेश याला वयाच्या 7 व्या महिन्यापासून थॅलेस्यामिया नावाच्या दुर्धर आजाराने ग्रासले,त्याच्यावर उपचार करण्यासाठी आणि त्याचे अस्थीमज्जा प्रत्यारोपण करण्यासाठी बऱ्याच रकमेची आवश्यकता होती,घरची परिस्थिती अतिशय खालावलेली आणि बिकट असतानाही त्याला वाचविण्यासाठी शर्थीचे प्रयत्न त्याचे वडील गणेश हे करत आहेत आणि अशा वेळेस संस्थेच्या सदस्या सौ.प्रियंकाताई खाडे यांनी संस्थेला ही बातमी दिली,त्यानंतर इतर सदस्यांच्या पडताळणीअंती चि. महेश याला 10 हजार रुपयांची मदत त्याच्या खात्यावर वळती करण्यात आली.
मु.भेदोडा येथील प्रफुल लोखंडे याचा रोजंदारी कामाहून परत येताना दुर्दैवी अपघात झाला,त्यात त्याच्या पायाचे हाड तुटले,त्याचे नुकतेच लग्न झाले होते,घरची परिस्थिती अत्यंत प्रतिकूल असल्याने त्याच्या औषधोपचारासाठी आणि ऑपरेशनसाठी त्याचे वडील श्री.बंडू लोखंडे यांनी पैशाची जुळवाजुळव केली,त्याचवेळेस संस्थेस काही मदत होईल का म्हणून विनंती केली,त्यानुसार संस्थेच्या सर्व सदस्यांच्या सहमतीने प्रफुल यास 10 हजारांची मदत करण्यात आली.
नाते आपुलकीचे ही संस्था सर्व सदस्यांच्या सहकार्याने समाजाभिमुख काम करण्यासाठी नेहमीच कटिबद्ध असते हे पुन्हा प्रकर्षाने समाजासमोर आले.