राळेगाव तालुका प्रतिनिधी-रामभाऊ भोयर
राळेगाव तालुक्यातील खैरी येथे जिल्हा परिषद शाळेत २७ जानेवारी रोज शुक्रवारला शाळा व्यवस्थापन समितीच्या उपाध्यक्ष ज्योतीताई जगधरे यांच्या अध्यक्षतेखाली व प्रमुख पाहुणे म्हणून शाळा व्यवस्थापन समितीचे अध्यक्ष खुशाल वानखेडे, सौ वैशाली दोडके, सौ सविता सवाई, सौ लता पवार ग्रा. प. सदस्य , सौ सरला ताई गवारकर ग्रा. प. सदस्य यांचे उपस्थितीत महिला पालक आनंद मेळावा घेण्यात आला. यात महिला चा हळदी कुंकवाचा कार्यक्रम तसेच महिला पालक व विद्यार्थ्यांचे विविध खेळ व सांस्कृतिक कार्यक्रम घेण्यात आले.
मकर संक्रांतीच्या पर्वावर जिल्हा परिषद उच्च प्राथमिक शाळा खैरी येथे शाळा व्यवस्थापन समिती व शिक्षक वृंद यांच्या संकल्पनेतून विद्यार्थ्यांचे शिक्षण व कला गुण यांना वाव मिळण्यासाठी व विद्यार्थ्यांच्या अभ्यासक्रमाविषयी माहिती महिला पालकांच्या माध्यमातून देण्याच्या हेतूने २७ जानेवारी रोज शुक्रवारला महिला पालक आनंद मेळावा व महिला पालक सभा घेण्यात आली. यामध्ये विद्यार्थ्यांच्या अभ्यासक्रम तसेच सामान्य ज्ञान परीक्षा व इतर कलागुणाबाबत या महिला पालक आनंद मेळावा व पालक सभेत शाळेचे मुख्याध्यापक संजय खडसे व शाळेचे इतर शिक्षक यांनी महिला पालकांसोबत विस्तृत चर्चा केली. अभ्यासक्रमासोबतच विद्यार्थ्यांच्या अंगी असलेल्या कलागुणांना कसा वाव मिळेल याबाबत ही चर्चा झाली व त्यानंतर आनंद मेळाव्यात महिला पालक व विद्यार्थी यांनी सांस्कृतिक कार्यक्रम व विविध खेळ खेळून महिला पालक मेळाव्याचा आनंद लुटला.
हळदी कुंकू व तिळगुळ देण्याच्या कार्यक्रमानंतर आनंद मेळाव्यामध्ये महिला पालकांनी संगीत खुर्ची ,वर्तुळामध्ये चंडू टाकने, लिंबू चमचा असे विविध खेळ खेळले तसेच महिलांची गीत गायन स्पर्धा व उखाणे घेण्याचा कार्यक्रम पार पडला. या कार्यक्रमांमध्ये विद्यार्थी व विद्यार्थिनींनी सुद्धा आपले कलागुण दाखवत लहान लहान विद्यार्थ्यांनी भाषण व गीत गायन तसेच चुटकुले सादर केले. हा महिला पालक आनंद मेळावा कार्यक्रम खूप उत्साहात व आनंदमय वातावरणात साजरा झाला. जिल्हा परिषद उच्च प्राथमिक शाळेने घेतलेल्या या महिला पालक आनंद मेळावा कार्यक्रमामुळे विद्यार्थ्यांच्या महिला पालक खूपच आनंदी झाल्या होत्या. असेच कार्यक्रम घेऊन विद्यार्थी व पालकात समन्वय साधण्यात यावा असे महिला पालक वर्गामधून सांगण्यात आले तसेच नियमित महिला पालक सभा घेऊन विद्यार्थ्यांच्या अभ्यासक्रम व इतर विषयावर चर्चा सत्र घेण्यात यावे असे सुद्धा महिला पालक वर्गातून सुचित करण्यात आले व त्याला शाळा व्यवस्थापन समिती व शिक्षक वृंदा कडून संमती देण्यात आली.
या महिला पालक आनंद मेळावा व पालक सभेचे प्रास्ताविक शाळेचे मुख्याध्यापक संजय खडसे यांनी केले तर या कार्यक्रमाचे उत्कृष्ट असे सूत्रसंचालन व आभार प्रदर्शन शाळेच्या शिक्षिका सौ शेंडे मॅडम यांनी केले. हा कार्यक्रम यशस्वी करण्याकरिता शाळेचे शिक्षक सुरेश सलाम ,प्रवीण दीडपाये ,राजेंद्र दूरबुडे,राजकुमार शिंदे, वसंत खाडे या शिक्षकांनी विशेष परिश्रम घेतले.
