वणी : येथील स्वावलंबी शिक्षण संस्था द्वारा संचालित सुशगंगा पब्लिक स्कूलमध्ये 27 फेब्रुवारी रोजी मराठी राजभाषा दिवस म्हणजेच मराठी भाषा दिन मोठ्या उत्साहात साजरा करण्यात आला. 27 फेब्रुवारी हा दिवस म्हणजे प्रसिद्ध ज्येष्ठ लेखक, कवी, कादंबरीकार विष्णू वामन शिरवाडकर म्हणजेच कुसुमाग्रज यांचा जन्मदिवस. कुसुमाग्रज यांच्या जन्मदिनी त्यांना आदरांजली अर्पण करण्यासाठी दरवर्षी मराठी भाषा दिन म्हणजेच मराठी राजभाषा दिवस साजरा केल्या जातो.
कुसुमाग्रज यांची जयंती तसेच मराठी राज्यभाषा दिवस याचे औचित्य साधून शाळेमध्ये विविध कार्यक्रमांचे आयोजन करण्यात आले. शाळेचे संस्थापक अध्यक्ष मा. प्रदिपजी बोनगिरवार व व्यवस्थापकीय संचालक मा.मोहनजी बोनगिरवार यांनी मराठी भाषेच्या संवर्धन व विकासाचे महत्त्व विषद करीत विद्यार्थ्यांना मराठी भाषा दिनाच्या शुभेच्छा दिल्या.
कार्यक्रमाची सुरुवात मान्यवरांच्या हस्ते स्वराज्य संस्थापक छत्रपती शिवाजी महाराज आणि कवी कुसुमाग्रज यांच्या प्रतिमेस पुष्पहार अर्पण करून करण्यात आली.
कार्यक्रमाचे प्रास्ताविक सौ. शारदा खुले यांनी केले. या भाषणात त्यांनी विद्यार्थ्यांना मराठी भाषेचा इतिहास, मराठी भाषेतील विविध महान ग्रंथ व कवी यांच्या बद्दल माहिती सांगितली. तसेच आपल्या दैनंदिन जीवनात मोठ्या प्रमाणात जास्तीत जास्त मराठी भाषेचा वापर करण्याचे आवाहन केले.
प्रस्तुत कार्यक्रमाला सोनल दुबे, प्रियांका पांडे, अजय खुले, सुषमा कुरेकर,दिपक ठेंगणे, विनायक किटे, भाग्यश्री कुरेकर, तन्मय खेवले आदी मान्यवरांनी मराठी भाषेला अधिकाधिक संपन्न करण्यासाठी व तिच्या समृद्धीसाठी ज्या साहित्यिक महात्म्यांनी आपले जीवन व्यतीत केले. त्यांच्याबद्दल आपण ऋणी असले पाहिजे असे संदेश दिला. तसेच प्रत्येकाने मराठी भाषेतील साहित्याचा अभ्यास करून तिची कीर्ती जगामध्ये दुरवर पसरली पाहिजे असे आवाहन केले.
उपरोक्त कार्यक्रमाचे संचालन पल्लवी वांढरे तसेच आभार प्रदर्शन माधवी लाभे यांनी केले. कार्यक्रमाच्या यशस्वितेसाठी शिक्षक व शिक्षकेतर कर्मचाऱ्यानी सहकार्य केले.