–

पोंभूर्णा तालुका प्रतीनीधी :- आशिष नैताम

पोंभूर्णा:-थेरगाव येथील लग्न कार्यक्रम आटोपून मावशीला बोर्डा बोरकर येथे सोडण्यासाठी येत असलेल्या मोटारसायकलचा देवाडा खुर्द गावानजीक रस्त्याच्या मधोमध उभ्या असलेल्या हायवा ट्रकला धडक दिल्याने झालेल्या अपघातात एक युवक ठार झाला असून यातील महिला गंभीर जखमी झाली आहे. सदर घटना मंगळवारला रात्री ९ च्या दरम्यान घडली.गौरव नेताजी मेश्राम (२१) रा.भानसी,ता.सावली असे मृतक युवकांचे नाव आहे.तर सुनीता रमेश आलाम (४५) रा.बोर्डा बोरकर,ता.पोंभूर्णा असे गंभीर जखमी असलेल्या महिलेचे नाव आहे.

पोंभूर्णा नजीक असलेल्या थेरगाव येथील नातेवाईकाचे लग्न समारंभ आटोपून बोर्डा बोरकर येथे मावशीला सोडण्यासाठी जात असताना देवाडा खुर्द‌‌‌ गावानजीक रस्त्याच्या मधोमध उभ्या असलेल्या हायवा ट्रकला (mh-40-cd-0480) या ट्रकला मोटर सायकलने धडक दिली यात दोघेही गंभीर जखमी झाले.तात्काळ त्यांना पोंभूर्णा ग्रामीण रुग्णालयात उपचारासाठी दाखल करण्यात आले.उपचारादरम्यान गौरव मेश्राम यांना डॉक्टराने मृत घोषित केले.गंभीर जखमीला पुढील उपचारासाठी चंद्रपूरला हलविण्यात आले. सदर घटनेचा तपास पोंभूर्णा पोलीस करीत आहेत