मनीपुर राज्यात आदिवासी महिलांना भररस्त्यात नग्न करून धिंड काढत सामुहिक बलात्कार करणाऱ्या, त्या नराधमांना फासावर लटकवा आणि राष्ट्रपती राजवट लागू करा . अशी मागणी ट्रायबल वुमेन्स फोरम अमरावती यांनी देशांचे पंतप्रधान नरेंद्र मोदी यांच्या कडे केली आहे . यासंदर्भात जिल्हाधिकारी अमरावती यांच्या मार्फत निवेदन पाठविण्यात आले आहे. मणिपूर मध्ये जमावाने दोन आदिवासी महिलांची भररस्त्यात नग्न धिंड काढुन त्यांच्यावर सामुहिक बलात्कार केल्याच्या संतापजनक घटनेचा ट्रायबल वुमेन्स फोरम, ट्रायबल फोरम, ट्रायबल युथ फोरम अमरावती या संघटनांनी जाहीर निषेध नोंदविला आहे.मन हेलावून टाकणारी घटना देशात घडली असून सकल जगातील मानवतेला काळीमा फासणारी आहे. सर्वात मोठी लोकशाही असलेल्या देशात संविधानाच्या अधिकाराचं दिवसाढवळ्या जाहीरपणे उल्लंघन होत , चिंधड्या उडत असल्याचा गंभीर आरोप ट्रायबल वुमेन्स फोरम केला आहे. मणिपूर राज्यातील थौबाल जिल्ह्यात दोन आदिवासी महिलांना काही नराधमांनी घेरले . त्यांनी त्या महिलांना विवस्त्र करून त्यांची भररस्त्यात नग्न धिंड काढली . त्यानंतर शेतात नेऊन त्यांच्यावर सामुहिक बलात्कार करण्यात आला.सदर घटना ही ४ मे २०२३ रोजची असल्याचा दावा करण्यात आला आहे. सद्या या घटनेचे व्हिडिओ समोर आले आहेत. आणि देशभरातील सोशल मीडियावर चर्चा होत आहे . या देशातील मुळनिवासी असलेला आदिवासी समाज आजही आपल्याच मायभूमीत सुरक्षित नसल्याचे वास्तव चित्र अधोरेखित झाले आहे. गेल्या मे महिन्यापासून मणिपूर राज्यात सातत्याने आदिवासी समाजावर अनन्वित, अन्याय, अत्याचार, जाळपोळ ,जातीय हिंसा, सामुहिक बलात्कार होत आहे.तरी सुद्धा केंद्र सरकारने आजपर्यंत याबाबत कोणतीही कठोर भूमिका घेतलेली नाही. असाही आरोप करण्यात आला आहे. याप्रसंगी ट्रायबल वुमेन्स फोरमच्या राज्य संघटक महानंदा टेकाम, शकुंतला मरस कोल्हे, सुरेखा ऊईके, नलिनी सिडाम, अर्चना धुर्वे, ज्योत्स्ना चुंबडे, शिला चांदेकर, जयश्री मरापे, मंगला सोयाम, छाया आत्राम, पुष्पा सोयाम, ललिता ऊईके, सुरेखा पेदांम, माया धुर्वे, सिंधू मरस कोल्हे, नंदा आत्राम, शुभांगी सिडाम, सुकन्या मरस कोल्हे, महानगर अध्यक्ष सुंदरलाल ऊईके, जिल्हाध्यक्ष दिनेश टेकाम, महासचिव गंगाराम जांबेकर, राजेश ऊईके, शशीकांत आत्राम, संतोष किनाके, हिंमत ऊईके श्रीकृष्ण ऊईके , शत्रुघ्न मडावी, मनोहर कोकाटे, पंकज सलाडे, प्रविण गजांम, वैभव लोखंडे आदी उपस्थित होते.

देशाला स्वातंत्र्य मिळण्यापूर्वी आणि स्वातंत्र्य मिळाल्यानंतर ही ७६ वर्षे होत आहे . तरी या देशातील विचित्र , विक्षिप्त , विकृत मानसिकता बदलली नाहीत. आदिवासी महीलां वरील अत्याचार सहन केले जाणार नाहीत .मनिपुर राज्यात तात्काळ राष्ट्रपती राजवट लागू करा .

महानंदा टेकाम राज्य संघटक ट्रायबल वुमेन्स फोरम महाराष्ट्र