राळेगाव तालुका प्रतिनिधी रामभाऊ भोयर
महाराष्ट्राच्या कृषीप्रधान संस्कृतीचं स्मरण आणि शेतकऱ्यांचे खरे मित्र बैल यांचे आभार मानण्याचा दिवस म्हणून पोळा सण संपूर्ण महाराष्ट्रभर उत्साहात साजरा केला जातो. दुसऱ्या दिवशी बाळ गोपाळांचा लाकडी नंदीबैल सजवून पारंपरिक वेशभूषा मध्ये तान्हा पोळा साजरा केला जातो. याचाच एक भाग म्हणून सोनामाता हायस्कूल चहांद येथेे तान्हा पोळा चे आयोजन करण्यात आले. या कार्यक्रमाच्या निमित्ताने वर्ग पाचवी चे सर्व विद्यार्थी आपापले लाकडी नंदीबैल घेऊन पारंपारिक वेशभूषे मध्ये उपस्थित झाले होते. सर्व विद्यार्थ्यांमध्ये उत्साहाचे वातावरण होते. शाळेच्या पटांगणामध्ये पोळ्याचे तोरण बांधण्यात आले. या तोरणाला रंगीबेरंगी पाने, फुले व फुग्यांनी सजवण्यात आले. पोळ्याची खासियत म्हणून महादेवाची गाणी व झडत्या म्हणण्यात आल्या. यानंतर सर्व नंदीबैलांवर गुढी फिरवून पोळा फुटला असे जाहीर करण्यात आले. सर्व मुलांना खाऊ वाटप करण्यात आला. शाळेतील शिक्षक शिवणकर सर, दांडेकर सर यांनी नंदीबैलांचे परीक्षण केले व त्यातून प्रथम क्रमांक प्रज्वलन मांडवकर, द्वितीय सुजल उंबरकर व तृतीय क्रमांक वेदांत मांडवकर यांना देण्यात आले.तसेच शालेय उपक्रमाचा एक भाग व कार्यानुभव या विषयातील एक घटक म्हणून विद्यार्थ्यांना मातीचे बैल बनवून आणण्यात सांगण्यात आले. विद्यार्थ्यांनी सुद्धा अतिशय सुबक देखण्या अशा मातीच्या बैलांच्या मुर्त्या तयार करून आणल्या. त्यांचे सुद्धा परीक्षण चिव्हाणे सर,गाव॔डे मॅडम यांनी केले. त्यामध्ये प्रथम क्रमांक रुपाली ख॔डाळकर, द्वितीय क्रमांक वेदांती गोटेफोडे व तृतीय मनिश सातघरे अशा पद्धतीने बक्षीस देण्यात आली. यानंतर विद्यार्थ्यांच्या पारंपारिक वेशभूषेमध्ये सुद्धा प्रथम क्रमांक श्रावणी महाजन, द्वितीय क्रमांक गौरव पेंदोर यांना देण्यात आले. तान्ह्या पोळ्याच्या निमित्ताने सर्व शाळेत आनंदाचे वातावरण होते. हा कार्यक्रम यशस्वी करण्यासाठी शाळेतील शिक्षक व शिक्षकेतर कर्मचारी,विद्यार्थिमंडळ यांचे सहकार्य लाभले.
