सहसंपादक : रामभाऊ भोयर
श्री वसंतराव नाईक शासकीय वैद्यकीय महाविद्यालय व रुग्णालय, यवतमाळ द्वारे “नमो नेत्र संजीवनी अभियान” यशस्वीरीत्या पार पडले. सदर अभियान हे मा. मुख्यमंत्री वैद्यकीय सहायता कक्ष यांच्या तत्वद्यानान्वये देशाचे लाडके पंतप्रधान श्री नरेंद्र मोदी यांच्या वाढदिवस पंधरवाडा कालावधीत राबविण्यात आला. संपूर्ण राज्य भरात १ लाखापेक्षा अधिक मोतियाबिंदू शस्त्रक्रिया आणि १० लाखापेक्षा अधिक चष्मे वितरणाचे लक्ष्य ठेवून हा अभियान घेण्यात आला होता.
श्री वसंतराव नाईक शासकीय वैद्यकीय महाविद्यालय व रुग्णालय, यवतमाळ तर्फे दिनांक १७ सप्टेंबर २०२५ ते २ ऑक्टोबर २०२५ दरम्यान “नमो नेत्र संजीवनी अभियान” अंतर्गत नेत्र तपासणी शिबिरांचे आयोजन करण्यात आले.या अभियानाचे मार्गदर्शन माननीय अधिष्ठाता डॉ. अनिल बत्रा यांच्या नेतृत्वाखाली झाले. नेत्ररोग विभाग प्रमुख व सहयोगी प्राध्यापक डॉ. स्नेहल बोंडे चौरसिया, सहाय्यक प्राध्यापक डॉ. अक्षय पडगिलवार आणि डॉ. सुप्रिया सुटे यांनी विशेष भूमिका बजावली.तसेच, नेत्ररोग विभागातील डॉ. अखिलेश राठोड, डॉ. कस्तूर पुनसे, डॉ. स्मितल जैस्वाल, डॉ. वैभव सावळे, डॉ. निखिल चांदुरे, डॉ. नेहल बोथरा, डॉ. श्वेता गजभिये, डॉ. प्रथमेश, डॉ. शंतनू आणि डॉ. संतोष यांनी विविध कॅम्प स्थळी जाऊन रुग्णांची सक्रिय तपासणी केली.
अभियानातील ठळक कामगिरी :नेत्र विभागाच्या ओपीडीमध्ये १३४५ रुग्णांची तपासणी करण्यात आली.यामधून ३९१ रुग्णांना चष्म्याचा नंबर देण्यात आला.या कालावधीत १५४ मोतीबिंदू शस्त्रक्रिया व २५ किरकोळ शस्त्रक्रिया करण्यात आल्या.
गावोगावी आयोजित कॅम्प :
आर्णी,चौसाळा, साने गुरुजी नगर, पिंपळगाव, मोहा, नांझा, भोसा, वाघापूर, मेंदळा, वाघडी, जोधमोहा आणि डोंगर खर्डा, इत्यादी या गावांत शिबिरे घेण्यात आली. या ठिकाणी १४५० रुग्णांची तपासणी झाली. यातील ६३५ रुग्णांना चष्म्यांचे नंबर देण्यात आले असून, २९९ रुग्णांची मोतीबिंदू शस्त्रक्रिया लवकरच पूर्णपणे मोफत केली जाणार आहे.याशिवाय, दृष्टी दोष असलेल्या रुग्णांना चष्म्यांचे वितरण थेट त्यांच्या घरी केले जाणार आहे, ही या अभियानाची विशेष बाब आहे.या उपक्रमामुळे जिल्ह्यातील अनेक नागरिकांना आधुनिक नेत्रतपासणी व उपचार विनामूल्य उपलब्ध झाले असून, गरजू रुग्णांना मोठ्या प्रमाणावर दिलासा मिळाला आहे.
सदर अभियान राबविण्यात मा. जिल्हा शल्य चिकित्सक कार्यालय आणि जिल्हा आरोग्य अधिकारी कार्यालयाचे अतिशय मोलाचे सहकार्य लाभले. या करिता अधिष्ठाता आणि नेत्र रोग विभाग यांनी सीएस डॉ सुखदेव राठोड आणि डीएचओ डॉ सुभाष ढोले यांचे आभार मानले आहे.
