सहसंपादक : रामभाऊ भोयर

स्थानिक कला, वाणिज्य महाविद्यालय राळेगाव येथे वाणिज्य विभाग व MKCL यांच्या संयुक्त विद्यमाने “संगणकावर आधारित ऑनलाइन शॉर्ट टर्म कोर्सेस” या विषयावर मार्गदर्शन वर्गाचे आयोजन करण्यात आले. कार्यक्रमाचे अध्यक्षस्थान महाविद्यालयाचे प्राचार्य डॉ. भास्करराव सावरकर यांनी भूषविले. सोबतच प्रमुख वक्ते म्हणून श्री. सचिन ढोबळे, डायरेक्टर MKCL यवतमाळ व श्री. अजय उघडे MKCL चे प्रतिनिधी उपस्थित होते. स्वागत समारंभानंतर कार्यक्रमाचे प्रास्ताविक, वाणिज्य विभाग प्रमुख डॉ. रुपेश पवार यांनी केले. प्रास्ताविकांमधून त्यांनी विद्यापीठात नवीन राष्ट्रीय शैक्षणिक धोरण लागू झालेले असून या धोरणाच्या माध्यमातून विद्यार्थ्यांचे कलागुण उन्नत करण्याकरिता प्रयत्न होत आहेत आणि त्यामध्ये संगणकाशी संबंधित ऑनलाइन शॉर्ट टर्म कोर्सेस हे क्रेडिट मिळविण्यासाठी अत्यंत उपयुक्त आहेत याबद्दल माहिती दिली.
प्रमुख वक्ते श्री. सचिन ढोबळे यांनी MKCL मार्फत घेण्यात येणाऱ्या सर्व कोर्सेस ची माहिती विद्यार्थ्यांना दिली. या कोर्सच्या माध्यमातून विद्यार्थी कशा पद्धतीने क्रेडिट मिळवू शकतात व त्यांच्या कलागुणांना कशा पद्धतीने वाव मिळू शकतो याबद्दल त्यांनी उपयुक्त माहिती दिली. सोबतच प्रमुख वक्ते श्री. अजय उघडे यांनी शॉर्ट टर्म कोर्सेस केल्यानंतर मिळणाऱ्या सर्टिफिकेटचा येणाऱ्या भविष्यकाळात कशा पद्धतीने उपयोग होऊ शकतो याबद्दल त्यांनी विद्यार्थ्यांना मार्गदर्शन केले. अध्यक्ष स्थानावरून बोलताना प्राचार्य डॉ. भास्करराव सावरकर यांनी सर्व विद्यार्थ्यांना महाविद्यालयात सुरू होणाऱ्या विविध सर्टिफिकेट कोर्सेस मध्ये उत्स्फूर्तपणे सहभाग नोंदवावा असे आवाहन केले.

सूत्रसंचालन प्रा. निलेश पडाल यांनी केले. तसेच आभार प्रा. विशाल वाघमारे यांनी मानले. या मार्गदर्शन वर्गाला महाविद्यालयातील सर्व शिक्षक व शिक्षकेतर कर्मचारी सोबतच महाविद्यालयातील विद्यार्थी उपस्थित होते. या वर्गाचे आयोजन व नियोजन वाणिज्य विभागाच्या वतीने करण्यात आले.