सहसंपादक : रामभाऊ भोयर
राळेगाव शहरातून जाणाऱ्या 361 बी बांधकाम करताना राष्ट्रीय महामार्गावरील चुकीच्या नियोजनामुळे आणि वाढत्या अवजड वाहनांच्या बेफाम वेगामुळे आज पुन्हा एक निष्पाप जीवाचा बळी गेला आहे. संत कृपा मंगल कार्यालया समोरील राळेगाव–वडकी मार्गावर हायड्रा क्रेनच्या धडकेत 60 वर्षीय व्यक्तीचा मृत्यू झाल्याची दुर्दैवी घटना दि. 26 फेब्रुवारी 2026 रोजी घडली.या प्रकरणी राळेगाव पोलीस ठाण्यात अप नं. 97/26 अन्वये कलम 281, 106 (1) BNS प्रमाणे गुन्हा दाखल करण्यात आला आहे.मृत व्यक्तीचे नाव विलास कवडुजी राऊत (वय 60 वर्षे, रा. तिरझडा, ता. कळंब, जि. यवतमाळ) असे असून ते एका कौटुंबिक कार्यक्रमासाठी रावेरी येथे आले होते. कार्यक्रम आटोपून ते संत कृपा मंगल कार्यालयासमोरील राळेगाव–वडकी रोडवरून अंदाजे दुपारी 2.45 वाजताच्या सुमारास पायी जात असताना वडकी कडून येणाऱ्या हायड्रा क्रेन क्र. MH29CJ0818 ने त्यांना जोरदार धडक दिली.अपघात इतका भीषण होता की त्यांच्या कमरेला व गुप्तभागावर गंभीर दुखापत झाली. त्यांना तातडीने ग्रामीण रुग्णालय, राळेगाव येथे नेण्यात आले; मात्र डॉक्टरांनी त्यांना मृत घोषित केले.या प्रकरणी मृतकाचे जावई संदिप गणपतराव भुडे यांनी राळेगाव पोलीस स्टेशन येथे जबानी रिपोर्ट दिला. संबंधित गुन्हा दाखल करण्यात आला.
भुडे यांनी दिलेल्या फिर्यादीत नमूद केले आहे की, क्रेन चालकाने वाहन भरधाव वेगात व निष्काळजीपणे चालवून त्यांच्या सासऱ्यांना धडक दिली व त्यांच्या मृत्यूस कारणीभूत ठरला.पोलीसांनी गुन्हा नोंद करून पुढील तपास सुरू केला आहे. संबंधित हायड्रा क्रेन चालकाविरुद्ध कायदेशीर कारवाईची प्रक्रिया सुरू असल्याची माहिती पोलिसांकडून देण्यात आली.361 बी राष्ट्रीय महामार्ग राळेगाव शहराच्या मध्यवर्ती भागातून जात असल्याने नागरिकांच्या सुरक्षिततेचा प्रश्न पुन्हा ऐरणीवर आला आहे. शहरातील गर्दीच्या भागातून अवजड वाहने, क्रेन, ट्रक यांची सततची वर्दळ सुरू असते. वेगमर्यादेचे पालन होत नसल्याने आणि योग्य वाहतूक नियंत्रण नसल्याने अपघातांची मालिका सुरूच आहे.
स्थानिक नागरिकांनी वारंवार मागणी करूनही येथे योग्य वेगमर्यादा फलक, झेब्रा क्रॉसिंग, स्पीड ब्रेकर, सिग्नल व्यवस्था किंवा पर्यायी बायपास मार्गाची प्रभावी अंमलबजावणी झालेली नाही. परिणामी निष्पाप नागरिकांना जीव गमवावा लागत आहे.अवजड वाहनांसाठी शहराबाहेरील पर्यायी मार्ग निश्चित करावा
वाहतूक पोलिसांची कायमस्वरूपी नियुक्ती करावी, सीसीटीव्ही कॅमेरे व वेगमापक यंत्रणा बसवावी अशी अपेक्षा राळेगाव शहर विषयांची आहे.
