यवतमाळ जिल्हा प्रतिनिधी रामभाऊ भोयर
पांढरकवडा येथील जंगोदाई पेनठाणा येथे आदिवासी उद्योग जत्रा २०२६ ची आज उत्साहपूर्ण वातावरणात सुरुवात झाली. जत्रेच्या पहिल्याच दिवशी नागरिकांनी मोठ्या संख्येने उपस्थिती दर्शवत परिसरात उत्साहाचे वातावरण निर्माण केले. विविध गावांमधून आलेल्या नागरिकांनी जत्रेला भेट देत आदिवासी संस्कृतीचा आनंद लुटला.
जत्रेमध्ये उभारण्यात आलेल्या विविध आदिवासी उद्योगांच्या स्टॉल्सना नागरिकांनी उत्स्फूर्त प्रतिसाद दिला. पारंपरिक वस्तू, हस्तकला, खाद्यपदार्थ आणि स्थानिक उत्पादनांनी नागरिकांचे विशेष लक्ष वेधून घेतले. या माध्यमातून स्थानिक उद्योजकांना आपली उत्पादने सादर करण्यासाठी एक चांगले व्यासपीठ उपलब्ध झाले आहे.उद्घाटन प्रसंगी आदिवासी मंत्री डॉ.अशोक उईके यांनी आपल्या भाषणात “मी समाजासोबत खंबीरपणे उभा आहे,” असे ठाम प्रतिपादन केले. त्यांनी आदिवासी समाजाच्या विकासासाठी शासन कटिबद्ध असल्याचेही नमूद केले. तसेच स्थानिक आमदार राजूभाऊ तोडसाम यांनीही “आम्ही दोघेही समाजासोबत आहोत आणि पुढेही सोबत राहू,” असा विश्वास व्यक्त केला. त्यांच्या या वक्तव्यामुळे उपस्थित नागरिकांमध्ये उत्साह व समाधानाचे वातावरण निर्माण झाले.
सायंकाळी आयोजित करण्यात आलेल्या सांस्कृतिक कार्यक्रमाने जत्रेची रंगत अधिकच वाढवली. पारंपरिक आदिवासी नृत्य, वेशभूषा, लोककला आणि ढोल-ताशांच्या गजरात सादर झालेल्या कार्यक्रमांनी उपस्थित प्रेक्षक मंत्रमुग्ध झाले.
एकूणच, आदिवासी उद्योग जत्रेच्या पहिल्याच दिवशी मिळालेल्या उत्स्फूर्त प्रतिसादामुळे पुढील दिवसांमध्येही मोठ्या प्रमाणात नागरिक उपस्थित राहतील, अशी अपेक्षा व्यक्त केली जात आहे. या जत्रेमुळे आदिवासी कला, संस्कृती व उद्योगांना चालना मिळत असल्याचे चित्र दिसून येत आहे.
