‘साधना’ हा रामराज्यात प्रवेश मिळवण्यासाठीचा’परवाना’ (लायसन्स) आहे,
श्री.हितेश निखार सनातन संस्था
( यवतमाळ) – कालमहिम्यानुसार रामराज्य येणारच आहे. जसे ‘पहाट होणे’ कुणी थांबवू शकत नाही, तसे ‘रामराज्यरूपी हिंदु राष्ट्राचे निर्माण’ कुणीही थांबवू शकत नाही. ‘रामराज्यरूपी हिंदु राष्ट्राची स्थापना होणार’, ही काळ्या दगडावरची रेघ आहे. रामराज्याचे आपल्याला साक्षीदार नाही, तर साथीदार व्हायचे आहे. आपणही रामराज्यात रहाण्यासाठी साधना करत धर्माचरणी बनले पाहिजे. आजच्या भाषेत सांगायचे, तर ‘साधना’ हा रामराज्यात प्रवेश मिळवण्यासाठीचा ‘परवाना’ (लायसन्स) आहे. सर्वोच्च प्रतीचा सतत टिकणारा आनंद केवळ साधनेनेच मिळतो. आपल्याला ईश्वरप्राप्ती करायची ओढ असो वा नसो, एक चांगले समाधानी जीवन जगता येण्यासाठीही साधना करणे महत्त्वाचे आहे. त्यामुळेच गुरुपौर्णिमेच्या निमित्ताने साधना करण्याचा आणि ती वाढवण्याचा संकल्प करूया.” असे प्रतिपादन सनातन संस्थेचे श्री. हितेश निखार यांनी ‘आनंदप्राप्ती अन् रामराज्याची स्थापना यांसाठी साधना’ या विषयांवर मार्गदर्शन करतांना केले. ते सनातन संस्थेच्या वतीने भातृमंडळ सभागृह विठ्ठलवाडी, यवतमाळ आणि एस. बी.हॉल वणी येथे आयोजित गुरुपौर्णिमा महोत्सवात ते बोलत होते. सनातन संस्थेच्या वतीने जिल्ह्यात यवतमाळ आणि वणी येथे, तसेच देशभरात एकूण ७५ ठिकाणी ‘गुरुपौर्णिमा महोत्सव’ भावपूर्ण वातावरणात संपन्न झाले.
यवतमाळ येथील गुरुपौर्णिमा महोत्सवात मार्गदर्शन करताना भारतीय विचार मंच विदर्भ प्रांत संयोजक डॉ. सतपाल सोहळे म्हणाले की, गुरुविना उद्धार नाही, कारण गुरूंना हिंदू धर्मामध्ये अनन्य साधारण महत्व आहे, जगातील सर्व पंथांचे मूळ हिंदू धर्मात आहे, पण सध्या हिंदू धर्मावर विविध आघात होत असतांना आपल्याला शत्रुबोध होने आवश्यक आहे, कारण जो पर्यंत आपल्याला शत्रुबोध होणार नाही, तो पर्यंत हिंदूचे संघटन होणार नाही,आणि हिंदूंवर होणारे आघात थांबणार नाहीत. एस. बी. हॉल वणी येथील महोत्सवात बोलतांना हिंदुत्वनिष्ठ श्री. कल्याण पांडे म्हणाले, हिंदु धर्मावरील आघाताला तोंड देण्यासाठी सर्व हिंदूंनी संघटित होणे आवश्यक आहे.
महोत्सवाच्या प्रारंभी श्री व्यासपूजा आणि प.पू. भक्तराज महाराज यांचे प्रतिमापूजन करण्यात आले. ठिकठिकाणी झालेल्या गुरुपौर्णिमा महोत्सवांत विविध मान्यवरांसह दोन्ही ठिकाणी मोठ्या संख्येने जिज्ञासू उपस्थित होते. या महोत्सवांत धर्म, अध्यात्म, साधना, बालसंस्कार, आचारधर्म, आयुर्वेद, प्रथमोपचार, स्वसंरक्षण, हिंदु राष्ट्र आदी विविध विषयांवरील ग्रंथप्रदर्शन, तसेच राष्ट्र-धर्म विषयक फलकप्रदर्शनही लावण्यात आले. गुरुपौर्णिमा महोत्सवात ‘स्वसंरक्षण प्रात्यक्षिके’ सुद्धा दाखवण्यात आली.
६ भाषांमध्ये ‘ऑनलाईन’ गुरुपौर्णिमा महोत्सव : देश-विदेशांतील भाविकांना गुरुपौर्णिमेचा लाभ घेता यावा यासाठी सनातन संस्थेच्या वतीने मराठी, हिंदी, इंग्रजी, गुजरात, तमिळ, मल्याळम् या ६ भाषांमध्ये ऑनलाईन गुरुपौर्णिमा महोत्सवही संपन्न झाले. या माध्यमांतून देश-विदेशांतील भाविकांनी ‘गुरुपौर्णिमा महोत्सवां’चा लाभ घेतला.
