सहसंपादक : रामभाऊ भोयर
मौजे आडगांव रंजे, ता. वसमत, जि. हिंगोली येथील तलाठी संतोष पवार यांची कार्यालयात घुसून भरदिवसा निघृण हत्या करण्यात आली असून या हत्येच्या निषेधार्थ विदर्भ पटवारी संघ नागपूर च्या वतीने राळेगाव तालुक्यातील तलाठी यांनी दिं.२९ऑगष्ट २०२४ रोज गुरवारला एक दिवसीय कामबंद आंदोलन करून तलाठी पवार यांच्या हत्येचा तिव्र शब्दात निषेध करत दोषींवर जलदगती न्यायालयात खटला चालवून मृतक व त्यांचे कुटुंबियांस न्याय मिळवून द्यावा तसेच तलाठी/मंडळ अधिकारी यांचे संरक्षणार्थ शासन प्रशासनाने ठोस पावले उचलावी अशी मागणी पटवारी संघांनी तहसीलदार यांना दिलेल्या निवेदनातून केली आहे.
शासकीय कर्तव्ये बजावताना तलाठी व मंडळ अधिकारी यांचेवर होणारे जिवघेणे हल्ले ही नित्याचीच बाब झाली आहे. अवैध गौण खनिज ऊत्खणन व वाहतूक यासाठी मुख्यतः तलाठी व मंडळ अधिकारी हे संघटीत गुन्हेगारीतून अवैध गौण खनिज ऊत्खणनात सहभागी टोळयांच्या रोषास बळी पडत असून त्यावर संघटनांनी वारंवार मागणी करुनही शासनाने अद्यापही संरक्षणार्थ कोणत्याही ठोस उपाययोजना केलेल्या नाहीत. परंतु कारवाया मात्र प्राधान्याने केल्या जातात.
वसमत तालुक्यातील घटनेने त्यावर कहर केलेला आहे. केवळ संशयातून तलाठी आपल्या शेतीचा फेरफार इतर नातेवाईकांचे नांवे करुन देईल या काल्पनिक भितीने भरदिवसा तलाठी कार्यालयात गेल्यानंतर कार्यालयात घूसून निघृण हत्या करण्यात आली असून या हत्या करणाऱ्या दोषींवर कठोर कारवाई करून न्यायालयात जलदगती खटला चालविण्यात यावा या आशयाचे निवेदन देण्यात आले असून निवेदन देतेवेळी तालुक्यातील सर्व तलाठी यावेळी उपस्थित होते.
.
