,

मानवतेची माणुसकी जपणारी आणि प्रत्येक सामाजिक उपक्रमात अग्रेसर असणारी नाते आपुलकीचे संस्था आजवर अनेक गरजू विद्यार्थ्यांना शैक्षणिक गरजू रूग्णास आरोग्य विषयक सहाय्य करून त्यांचे आयुष्य उज्ज्वल करण्यात महत्त्वाची भूमिका बजावत आहे. या संस्थेच्या अनेक विद्यार्थ्यांनी डॉक्टर, इंजिनियर, अधिकारी होऊन परत संस्थेशी जोडले जाऊन समाजासाठी कार्य करण्याचा मोलाचा वारसा पुढे नेला आहे.
अशाच सामाजिक भावनेतून कु. विनीता विनेश स्वामी वय ८ वर्षे, रा. श्यामनगर, मूल रोड, बंगाली कॅम्प, चंद्रपूर ह्या लहानग्या मुलीला आर्थिक मदत करण्यात आली. विनीता ही कॅन्सर या दुर्धर आजाराशी लढा देत असून तिचे उपचार सुरू आहेत. तिचे वडील विनेश स्वामी ऑटोचालक असल्याने लाखो रुपयांचा उपचाराचा खर्च भागवणे त्यांच्यासाठी अत्यंत कठीण ठरत आहे. मोठा खर्च करूनही परिस्थिती हाताबाहेर गेल्यामुळे विनीताला पुन्हा चंद्रपूर सरकारी रुग्णालयात दाखल करावे लागले.
ही माहिती मिळताच नाते आपुलकीचे संस्थेचे अध्यक्ष श्री. संतोष ताजने यांनी तत्काळ संपर्क साधून रुग्णाची भेट घेतली व परिस्थितीची पाहणी केली. संस्थेतर्फे उपचारासाठी ₹8,000/- आर्थिक मदत देण्यात आली.
या वेळी संस्थेचे अध्यक्ष संतोष ताजने, उपाध्यक्ष किसन नागरकर, सचिव प्रा. प्रमोद उरकुडे, अविनाश ढुमणे, राजेश ताजने, मारोती पिंपळशेंडे, गजानन गायकवाड व मनोज अडगूलवार, धर्मवार सहारे हे संस्था सदस्य उपस्थित होते.

संस्थेचा हा उपक्रम समाजातील माणुसकीचे मूल्य, संवेदनशीलता आणि एकमेकांप्रती असलेली जबाबदारी अधोरेखित करणारा आहे. विनीताच्या लवकर बरे होण्यासाठी सर्वांनी मनापासून प्रार्थना केली.
नाते फक्त रक्ताचे नसते तर कधी कधी मदतीचा हातही नात्यांना अर्थ देतो