सहसंपादक : रामभाऊ भोयर

पांढरकवडा :- काल पार पडलेली बैठक समाजासाठी प्रेरणा व ऊर्जा देणारी ठरली. या बैठकीत राजकीय व सामाजिक चर्चेपेक्षा समाजाची आर्थिक परिस्थिती कशी सुधारता येईल, यावर अधिक भर देण्यात आला. विशेषतः आधुनिक शेतीच्या माध्यमातून शेतकऱ्यांचे उत्पन्न वाढवता येईल, याबाबत सखोल मार्गदर्शन करण्यात आले.
मार्गदर्शन करताना कुमरे सर यांनी सांगितले की, “एक एकर शेती असलेला शेतकरीही गरीब राहत नाही, फक्त त्याला योग्य दिशा, आधुनिक तंत्रज्ञान आणि मेहनतीची जोड मिळायला हवी.” कुमरे सर हे स्वतः शेतकरी पुत्र असून समाजासाठी तळमळीने काम करणारे व्यक्तिमत्त्व असल्याचे यावेळी उपस्थितांनी नमूद केले.
या बैठकीचा मुख्य उद्देश आधुनिक शेती पद्धतींबाबत मार्गदर्शन करणे हाच होता. कुमरे सर यांच्यासोबत सातत्याने संपर्कात राहिल्यास शेतकऱ्यांना निश्चितच फायदा होईल, तसेच ते प्रत्येक टप्प्यावर मदत करण्यास तयार असल्याचेही यावेळी स्पष्ट झाले.दुपारी १ वाजल्यापासून ते रात्री 8 वाजेपर्यंत चाललेल्या या बैठकीत तालुक्यातील प्रमुख नागरिक, शेतकरी बांधव व नवयुवक मोठ्या संख्येने उपस्थित होते. विशेष म्हणजे कोणतेही औपचारिक आमंत्रण नसतानाही फक्त संदेशाच्या माध्यमातून सर्वजण एकत्र आले, ही बाब उल्लेखनीय ठरली.
ही बैठक समाजाला नवी दिशा देणारी ठरली असे म्हटले तर वावगे ठरणार नाही. नवयुवकांसाठी ही बैठक विशेष प्रेरणादायी ठरली. आगामी काळात आधुनिक शेतीसाठी किमान १०० शेतकऱ्यांना एकत्र जोडण्यावर पुढील बैठकीत सविस्तर चर्चा करण्यात येणार असल्याचे यावेळी सांगण्यात आले.या यशस्वी बैठकीसाठी मार्गदर्शन करणाऱ्या कुमरे सरांचे तसेच उपस्थित सर्व मान्यवर व शेतकरी बांधवांचे आयोजकांनी मनःपूर्वक आभार मानले.