डॉ. राजीव येरावडेकर यांची मुख्य उपस्थिती
सहसंपादक : रामभाऊ भोयर
स्वस्थ माता, सुरक्षित प्रसूती आणि सदृढ बालक हे राष्ट्रनिर्मितीचे भक्कम आधारस्तंभ आहेत, या उद्देशाने Symbiosis College of Nursing (SCON) तर्फे “जन्म तयारी” या विषयावर सतत नर्सिंग व्यावसायिक विकास (CPD) कार्यक्रम यशस्वीरित्या आयोजित करण्यात आला. हा कार्यक्रम सिंबायोसिस आंतरराष्ट्रीय विद्यापीठ,लवळे, पुणे (Deemed University) येथे संपन्न झाला.
या उपक्रमाला महाराष्ट्र परिचर्या परिषद (MNC) कडून अधिकृत मान्यता दिली होती . सर्व सहभागी परिचारिकांना १० क्रेडिट पॉइंट्स प्रदान करण्यात आले. त्यामुळे हा कार्यक्रम नर्सिंग क्षेत्रातील ऐतिहासिक व शैक्षणिकदृष्ट्या महत्त्वाचा ठरला.
मान्यवरांच्या उपस्थितीत उद्घाटन
कार्यक्रमाचे उद्घाटन डॉ .राजीव येरावडेकर, डॉ . शारदा चव्हाण एमएनसी ऑब्झर्व्हर यांच्या सन्माननीय उपस्थितीत झाले.
मान्यवरांनी मातृत्व व नवजात शिशु आरोग्यसेवेतील नर्सिंग व्यावसायिकांची भूमिका अत्यंत निर्णायक असल्याचे प्रतिपादन केले.
वैज्ञानिक सत्रांमध्ये मातृत्व काळजीचा सर्वसमावेशक आढावा घेताना या CPD कार्यक्रमात माता व नवजात शिशु काळजीच्या विविध पैलूंवर सखोल मार्गदर्शन करण्यात आले. प्रमुख विषयांमध्ये
जन्म तयारीचे नियोजन
गर्भधारणा व प्रसूतीदरम्यान धोक्याची लक्षणे ओळखणे
आपत्कालीन प्रसूती काळजी
माता मानसिक आरोग्य
प्रसूतीनंतरची काळजी
कुशल जन्म उपस्थितीचे महत्त्व
या सर्व घटकांवर भर देत नर्सिंग व्यावसायिकांचे ज्ञान, कौशल्य आणि क्षमता वृद्धिंगत करण्यावर लक्ष केंद्रित करण्यात आले.
अनेक तज्ञांचे मार्गदर्शन
कार्यक्रमात प्रबोधनपर व्याख्याने देणाऱ्या प्रमुख तज्ञांमध्ये डॉ. एस. जी. जोशी, डॉ. शीला उपेंद्र,
डॉ. सिता देवी, डॉ. शीतल पिंपळेकर, डॉ. सुप्रिया पोर्टल,जॉयस मथिवानन व पायल भगत यांचा समावेश होता.
त्यांनी सर्वसमावेशक मातृत्व काळजी, आधुनिक पद्धती व व्यावहारिक दृष्टिकोन याविषयी मौल्यवान मार्गदर्शन केले.
गुणवत्तापूर्ण आरोग्यसेवेची वचनबद्धता
हा कार्यक्रम डॉ . सोनोपंत जोशी डॉ . शीला उपेंद्र आणि जेसी भिडे, नर्सिंग अधिक्षक यांच्या मार्गदर्शनाखाली यशस्वीरित्या पार पडला.
रुग्णालय नर्सिंग अधिक्षक जेसी भिडे मॅडम यांनी सांगितले की, हा निरंतर परिचर्या प्रशिक्षण/CPD कार्यक्रम रुग्णालयाच्या व्यावसायिक विकास आणि दर्जेदार मातृत्व आरोग्यसेवेप्रती असलेल्या सातत्यपूर्ण बांधिलकीचे द्योतक आहे.
कार्यक्रमाचे अंतिम ध्येय:
परिचारिकांना रुग्णालयात स्वस्थ माता, सुरक्षित प्रसूती आणि निरोगी बालक घडविण्यासाठी ज्ञान, कौशल्य,तंत्रज्ञान, चपळता , चाणाक्ष निरीक्षण,संवेदनशीलता , ममत्व, आपुलकी यांचा संगम येणे अत्यावश्यक आहे. SCON चा हा ऐतिहासिक CPD उपक्रम मातृत्व आरोग्य क्षेत्रात नवे मानदंड प्रस्थापित करणारा ठरला आहे अशी माहिती नर्सिंग उपअधीक्षक जिजो थॉमस यांनी दिली.
