यवतमाळ जिल्हा प्रतिनिधी रामभाऊ भोयर
वर्धा :- विदर्भातील ज्येष्ठ राजकारणी, शिक्षणतज्ज्ञ व समाजसेवक दत्ता मेघे यांचे रविवारी (२२ मार्च) नागपूर येथे निधन झाले. ते ९० वर्षांचे होते. त्यांच्या निधनामुळे विदर्भासह राज्याच्या राजकीय, शैक्षणिक आणि सामाजिक क्षेत्रात मोठी पोकळी निर्माण झाली आहे.
दत्ता मेघे यांनी आपल्या राजकीय कारकिर्दीत लोकसभा आणि राज्यसभा या दोन्ही सभागृहांचे प्रतिनिधित्व केले होते. तसेच ते महाराष्ट्र विधान परिषद सदस्य म्हणूनही कार्यरत होते.
शैक्षणिक क्षेत्रात त्यांनी नागपूर व वर्धा परिसरात अनेक शैक्षणिक संस्था उभारून विद्यार्थ्यांसाठी मोठे योगदान दिले. विशेषतः वैद्यकीय व अभियांत्रिकी शिक्षणाच्या प्रसारात त्यांचे कार्य उल्लेखनीय मानले जाते.
आपल्या प्रदीर्घ राजकीय प्रवासात त्यांनी विविध पक्षांमध्ये महत्त्वाच्या जबाबदाऱ्या सांभाळल्या. सर्वांशी सलोख्याचे संबंध ठेवणारे आणि संयमी नेतृत्व करणारे नेते म्हणून त्यांची ओळख होती. राजकारणासोबतच सामाजिक कार्यातही ते नेहमी सक्रिय राहिले.
त्यांच्या निधनाने विदर्भातील जनतेमध्ये शोककळा पसरली असून विविध स्तरांतून त्यांना श्रद्धांजली अर्पण करण्यात येत आहे.
