यवतमाळ जिल्हा प्रतिनिधी रामभाऊ भोयर

राळेगाव शहरात अनुसूचित जमाती (परधान) समाजातील व्यक्तीला जातिवाचक शिवीगाळ करत जीवे मारण्याची धमकी दिल्याची गंभीर घटना समोर आल्याने संपूर्ण परिसरात संतापाची लाट उसळली आहे. या प्रकरणी संबंधित नगरसेवकावर कठोर कायदेशीर कारवाई करून तत्काळ गुन्हा दाखल करण्याची जोरदार मागणी आदिवासी समाज संघटनेने केली आहे.

मिळालेल्या माहितीनुसार, राळेगाव येथील रहिवासी प्रशांत मधुकर नैताम (वय ४५) हे नगरपंचायतमध्ये कंत्राटी वीज कामगार म्हणून कार्यरत आहेत. दिनांक ५ मार्च रोजी सार्वजनिक ठिकाणी, अनेक नागरिकांच्या उपस्थितीत, नगरसेवक शशिकांत उर्फ बाळू धुमाळ यांनी त्यांना जातिवाचक शिवीगाळ करून अपमानित केले तसेच जीवे मारण्याची उघड धमकी दिल्याचा गंभीर आरोप करण्यात आला आहे.या घटनेमुळे केवळ प्रशांत मधुकर नैताम नव्हे, तर संपूर्ण आदिवासी (परधान) समाजाच्या स्वाभिमानाला ठेच पोहोचली असल्याची भावना व्यक्त होत आहे. भारतीय संविधानाने दिलेल्या समानता, सन्मान आणि सुरक्षिततेच्या मूलभूत अधिकारांचा हा उघड उल्लंघन असल्याचे निवेदनात नमूद करण्यात आले आहे.

दरम्यान, या प्रकरणी न्याय मिळवण्यासाठी पीडित प्रशांत मधुकर नैताम, त्यांचे कुटुंबीय व समाज बांधवांनी यापूर्वीच राळेगाव विधानसभा मतदारसंघाचे आमदार व आदिवासी विकास मंत्री प्रा. डॉ. अशोक उईके यांची भेट घेतली. मंत्री महोदयांना सविस्तर निवेदन देत या गंभीर घटनेची माहिती देण्यात आली असून, संबंधित प्रकरणावर तातडीने कारवाई करण्याबाबत चर्चा करण्यात आली. मंत्री उईके यांनीही या प्रकरणाची दखल घेत न्याय मिळवून देण्याचे आश्वासन दिल्याची माहिती समाज बांधवांनी दिली आहे.विशेष म्हणजे, संबंधित नगरसेवकाकडून यापूर्वीही अशा प्रकारचे वर्तन होत असल्याचे आरोप करण्यात येत असून, त्यामुळे पीडित व्यक्ती सतत भीतीच्या छायेखाली जीवन जगत असल्याचे सांगण्यात आले आहे. या घटनेमुळे राळेगाव परिसरात तणावपूर्ण वातावरण निर्माण झाले असून प्रशासनासाठी ही अत्यंत संवेदनशील बाब ठरत आहे.

या प्रकरणी आदिवासी समाज संघटनेने खालील ठोस मागण्या केल्या आहेत:
संबंधित नगरसेवकाविरोधात SC/ST अत्याचार प्रतिबंधक कायदा, १९८९ अंतर्गत तात्काळ गुन्हा दाखल करावा, दोषींवर कठोरात कठोर कारवाई करून पीडिताला तातडीने न्याय द्यावा.या प्रकरणाच्या पार्श्वभूमीवर आदिवासी समाजाच्या वतीने राळेगाव येथील तहसीलदारांना सविस्तर निवेदन सादर करण्यात आले. या निवेदनात संबंधित नगरसेवकाविरोधात तात्काळ गुन्हा दाखल करून कठोर कायदेशीर कारवाई करण्यात यावी, तसेच पीडित प्रशांत मधुकर नैताम यांना संरक्षण व न्याय मिळवून द्यावा, अशी ठोस मागणी करण्यात आली आहे.हेच निवेदन राळेगाव नगरपंचायत मुख्याधिकारी तसेच राळेगाव पोलीस स्टेशन येथेही सादर करण्यात आले आहे.प्रशासनाने या प्रकरणाची गांभीर्याने दखल घेऊन त्वरित योग्य ती कार्यवाही करावी, अन्यथा आदिवासी समाजाच्या वतीने तीव्र आंदोलन छेडण्यात येईल, असा इशाराही निवेदनाद्वारे देण्यात आला आहे.

यावेळी मधुकर गेडाम, संदीप पेंदोर, दिलीप कन्नाके, राहुल सोयाम, दिनेश गेडाम, नारायण पेंदोर, सीमा ताई एड्सकर, अतुल सोयाम, मनोज पेंदोर, सुधाकर गेडाम, अनिल कुमरे, गजानन मेश्राम, अंकुश कुळसंगे, मारुती शेडमाके, दिनेश झुंझूणकर, संजय गोहाडे आदी समाज बांधव मोठ्या संख्येने उपस्थित होते.