
- स्वयंसिद्धा सीता पुरस्काराचे थाटात वितरण
- ॲड. वामनराव चटप व सरोज काशीकर यांची उपस्थिती
सहसंपादक : रामभाऊ भोयर
अजूूनही आपला समाज पुरूषप्रधान असतांना आलेल्या परिस्थितीत आपले सर्वस्व अर्पण करून ज्या मातांनी नियतीला दोष न देता सीतामातेच्या कार्यातून प्रेरणा घेत संघर्ष करीत मुलांना उच्चशिक्षित सोबतच सुसंस्कारित बनवून आदर्श निर्माण केला अशा महिला समाजाच्या आयकाॅन असल्याचे प्रतिपादन शेतकरी संघटनेचे जेष्ठ नेते माजी आमदार ॲड. वामनराव चटप यांनी अध्यक्षस्थानाहून बोलतांना केले. राळेगाव तालुक्यातील प्रसिद्ध व पुरातन सीतामंदिर प्रांगणात आयोजित भव्य स्वयंसिद्धा सीतागौरव पुरस्कार वितरण कार्यक्रमात ॲड.वामनराव चटप बोलत होते. उद्घाटन माजी आमदार सरोज काशीकर यांनी केले. युगात्मा शरद जोशी यांच्या प्रतिमेला हारार्पण करून व दिप प्रज्वलन करून कार्यक्रमाची सुरूवात झाली.
प्रमुख अतिथी शेतकरी संघटनेचे अध्यक्ष ललितदादा बहाळे, महिला आघाडीच्या अध्यक्षा प्रज्ञा बापट, शैला देशपांडे, राजश्री झोटींग, जोत्स्ना बहाळे, प्रा.कल्पना मोहितकर, मधुसूदन हरणे, सतीश दाणी, राजेंद्र झोटिंग, रावेरी सरपंच राजेंद्र तेलंगे, नारायण काकडे, बाळासाहेब देशमुख, कृष्णराव भोंगाडे, मुकेश मासुरकर, दिलीप भोयर आदी मान्यवर व्यासपीठावर उपस्थित होते.
शेतकरी नेते युगात्मा शरद जोशी यांनी जीर्णोद्धार केलेल्या यवतमाळ जिल्ह्याच्या राळेगाव तालुक्यातील रावेरी येथील प्राचीन सीता मंदिर परिसरात सीतानवमीच्या पावन पर्वावर दिनांक 5 मे रोजी स्वयंसिद्धा सीता सन्मान सोहळा संपन्न झाला. या सोहळ्यात राज्यातील ज्या महिलांनी पतीचे निधन किंवा घटस्फोटानंतर हिंमत न हारता संयमाने विपरीत परिस्थिती व समाजव्यवस्थेशी संघर्ष करून आपल्या पाल्यांना लवकुशांप्रमाणे पायावर उभे करून आत्मनिर्भर, समाजातील प्रतिष्ठित व सन्माननीय नागरिक म्हणून घडवले आहे, अशा कर्तृत्ववान धैर्यशील माता रोहिणी शशांक सावजी रा. नागपूर, अंजना लटारी काळे रा.कोरपना, पूर्वा सुधीर देशपांडे रा.राजुरा, उज्वला दिलीप मोंढे रा. नागपूर, वंदना मनोज कुबडे रा. वर्धा, संगीता सुनील मोहितकर रा. वरोरा, प्रणाली शत्रुध्न बावणे रा. नागपूर या सात कर्तबगार महिलांना शाल, श्रीफळ, सन्मानचिन्ह, मानपत्र, साडी व पुष्पगुच्छ देऊन स्वयंसिद्धा सीता पुरस्काराने गौरवण्यात आले. यावेळी मानपत्राचे वाचन डाॅ.नुपूर देशपांडे- गुप्ता, प्रा.लिना शेंडे, रेखा हरणे, स्नेहा जानवे, रोशनी टेकाम, विधी बावणे, मनस्वी बावणे यांनी केले.
कार्यक्रमाचे प्रास्ताविक शैला देशपांडे, संचालन प्रा. लीना शेंडे आणि आभार रेखाताई हरणे यांनी मानले. कार्यक्रमाच्या यशस्वीतेसाठी नामदेव काकडे, गणेश मुटे, मधुकर चिंचोलकर, रोहित हरणे, सारंग धरणे, मुकेश धाडवे, गिरीश तुरके, गजानन झोटिंग, अक्षय महाजन, भास्कर पाटील, अभिजीत लाखे आणि शेतकरी संघटना महिला आघाडी, हनुमान देवस्थान ट्रस्ट, सीता नवमी महिला उत्सव समिती, रावेरी ग्रामपंचायत, रावेरी महिला बचत गट, महिला वारकरी भजन मंडळी यांनी सहकार्य केले. या सोहळ्याला मोठ्या संख्येने महिला व पुरुष उपस्थित होते.
