सहसंपादक : रामभाऊ भोयर
जि.प.उ.प्रा. सेमी इंग्रजी माध्यम डिजिटल शाळा वनोजा येथे पदाधिकारी सन्मान सोहळा व शिक्षकांचा निरोप समारंभ मोठ्या उत्साहात संपन्न झाला. कार्यक्रमाचे अध्यक्षस्थान मा. श्रीकांतजी वटाणे (पोलीस पाटील, वनोजा) यांनी भूषवले. प्रमुख पाहुणे म्हणून मा. राजुभाऊ बेताल (फिल्ड को-ऑर्डिनेटर, राळेगाव), श्री. सिद्धार्थजी नगराळे (प्रतिष्ठित नागरिक), मा. भास्करजी काचोळे (तंटामुक्ती अध्यक्ष), तसेच श्री. जितेंद्र खोडे (पत्रकार, दैनिक युवाक आधार जिल्हा प्रतिनिधी यवतमाळ) उपस्थित होते.
कार्यक्रमाची सुरुवात क्रांतीज्योती सावित्रीबाई फुले यांच्या प्रतिमेचे पूजन व माल्यार्पणाने झाली. त्यानंतर ग्रामपंचायत पदाधिकारी व शाळा व्यवस्थापन समितीचे एकवीस मान्यवरांना शाळेला दिलेल्या सहकार्याबद्दल सन्मानित करण्यात आले. आदरणीय श्री. सुनील मेश्राम सर यांना व सौ. सविता उईके मॅडम यांना सस्नेह भेटवस्तू देऊन निरोप देण्यात आला. विशेष म्हणजे ग्रामस्थांनी उईके मॅडम यांना ज्यूपिटर गाडी भेट देत भावपूर्ण सन्मान केला.
विद्यार्थ्यांनी मनोगत व्यक्त करताना वातावरण भारावून गेले. व्यवस्थापन समिती अध्यक्ष श्री. मोरेश्वरजी वटाणे यांच्यासह विविध मान्यवरांनी आपल्या भावना व्यक्त केल्या. गावातील भजन मंडळांनीही सस्नेह भेट दिल्या. उईके मॅडम यांनी शाळेसाठी केलेल्या सहकार्याचे कौतुक सर्वत्र झाले.
कार्यक्रमात सातशे लोकांनी स्वादिष्ट भोजनाचा आस्वाद घेतला. महिला भजन मंडळांनी भोजन व लाडू तयार करून सहकार्य केले. कार्यक्रमाचे सूत्रसंचालन श्री. अमोल भोयर सर यांनी केले तर अखेरीस शाळेच्या वतीने श्री. भोयर सर यांनी सर्वांचे आभार मानले.
