प्रतिनिधी//शेख रमजान
ढाणकी शहराची वाढती लोकसंख्या आणि परिसरातील गावांसाठी बाजारपेठेचे महत्त्वाचे ठिकाण लक्षात घेता, शहरात नवीन दोन आधार केंद्र सुरू करण्याचा महत्त्वपूर्ण ठराव नगरपंचायत प्रशासनाकडून मंजूर करण्यात आला आहे. ४ फेब्रुवारी २०२६ रोजी पार पडलेल्या नगरपंचायतीच्या सर्वसाधारण सभेत हा निर्णय घेण्यात आला.
नागरिकांची गैरसोय टाळण्यासाठी पुढाकार
सध्याच्या काळात सर्व शासकीय योजनांचा लाभ घेण्यासाठी आधार कार्ड अनिवार्य झाले आहे. मात्र, शहरात पुरेशी आधार केंद्रे उपलब्ध नसल्यामुळे नागरिकांना वेळेचा अपव्यय आणि आर्थिक भुर्दंड सहन करावा लागत होता. ही अडचण ओळखून नगरपंचायत अध्यक्ष सौ. अर्चना सुंदरकांता वासमवार यांनी हा प्रस्ताव मांडला, ज्याला उपनगर अध्यक्ष श्री. दत्तदिगांबर श्रीकृष्ण वानखेडे यांनी अनुमोदन दिले.
प्रस्ताव वरिष्ठांकडे रवाना
या ठरावाद्वारे शासनाला विनंती करण्यात आली आहे की, ढाणकी शहरात तातडीने दोन नवीन आधार केंद्र सुरू करण्यात यावेत. नगरपंचायतीच्या या निर्णयामुळे स्थानिक नागरिकांसह आजूबाजूच्या ग्रामीण भागातील लोकांची मोठी गैरसोय दूर होणार आहे. सभेने या प्रस्तावास सर्वानुमते मंजुरी दिली असून, पुढील कार्यवाहीसाठी हा प्रस्ताव वरिष्ठ कार्यालयाकडे पाठवण्यात आला असल्याची माहिती मुख्याधिकाऱ्यांनी दिली आहे.
