सहसंपादक : रामभाऊ भोयर
महाराष्ट्र प्रदेश सरपंच संघटना, यवतमाळ जिल्ह्याच्या वतीने मुदत संपलेल्या ग्रामपंचायतींवर प्रशासक म्हणून विद्यमान सरपंचांची तसेच प्रशासकीय मंडळ म्हणून उपसरपंच व सदस्यांची तात्काळ नियुक्ती करण्यात यावी, अशी मागणी करण्यात आली. या संदर्भात जिल्हा परिषद यवतमाळ येथील मुख्य कार्यकारी अधिकारी (सी.ओ.) यांच्याशी चर्चा करून निवेदन देण्यात आले.
यावेळी मुख्य कार्यकारी अधिकाऱ्यांनी या मागणीवर सकारात्मक भूमिका घेत आज दि. ५ मार्च २०२६ रोजी कार्यालयीन वेळेपर्यंत सरपंचांना प्रशासक म्हणून तसेच उपसरपंच व सदस्य यांना प्रशासकीय मंडळ म्हणून नियुक्ती आदेश देण्यात येतील, अशी ग्वाही दिली.
यापूर्वी सरपंच संघटनेची बैठक शासकीय विश्रामगृह येथे पार पडली. बैठकीनंतर सर्व सरपंचांनी जिल्हा परिषद कार्यालय येथे जाऊन मुख्य कार्यकारी अधिकाऱ्यांना निवेदन सादर केले. यावेळी “सरपंच संघटना जिंदाबाद” अशा घोषणांनी परिसर दणाणून गेला.
या वेळी महाराष्ट्र प्रदेश सरपंच संघटनेचे विदर्भ सरचिटणीस सुधीर पाटील जवादे, विदर्भ सल्लागार लिनाताई तुरणकर, जिल्हाध्यक्ष तुकाराम माथनकर, महिला जिल्हाध्यक्ष सविताताई जाधव, राळेगाव तालुका अध्यक्ष लताताई घोटेकर, यवतमाळ तालुका अध्यक्ष उमेश राठोड, गीताताई उपरे, वैजयंतीताई ठाकरे, सुधीर कडुकार, बंडू वेले, जयंत गुघाणे पाटील यांच्यासह यवतमाळ जिल्ह्यातील बहुसंख्य सरपंच उपस्थित होते.
