यवतमाळ जिल्हा प्रतिनिधी रामभाऊ भोयर
सामाजिक बांधिलकी जपत पत्रकारितेतून जनतेच्या प्रश्नांना न्याय देणारे निर्भीड पत्रकार मनोहर बोभाटे यांना प्रतिष्ठेचा डॉ. बाबासाहेब आंबेडकर पत्रकारिता पुरस्कार उत्साहपूर्ण वातावरणात प्रदान करण्यात आला. विशेष म्हणजे हा सन्मान डॉ. बाबासाहेब आंबेडकर यांच्या विचारांना अभिवादन करणारा असून, तोच महात्मा ज्योतिबा फुले यांच्या जयंतीदिनी मिळाल्याने सोहळ्याला ऐतिहासिक आणि प्रेरणादायी स्वरूप प्राप्त झाले.
मनोहर बोभाटे यांनी ग्रामीण भागातील मूलभूत समस्या, शेतकरी अडचणी, प्रशासनातील त्रुटी आणि सामाजिक प्रश्नांवर सातत्याने लेखन करत सामान्य जनतेचा आवाज बुलंद केला आहे. त्यांच्या वस्तुनिष्ठ, निर्भीड आणि समाजाभिमुख पत्रकारितेमुळे अनेक प्रश्न प्रशासनाच्या दारात पोहोचले आणि त्यावर कार्यवाहीही झाली. याच कार्याची दखल घेत त्यांना हा मानाचा पुरस्कार प्रदान करण्यात आला.
पुरस्कार वितरण सोहळा उत्साहात पार पडला असून, यावेळी विविध क्षेत्रातील मान्यवर, सामाजिक कार्यकर्ते, पत्रकार बांधव आणि नागरिक मोठ्या संख्येने उपस्थित होते. उपस्थितांनी बोभाटे यांच्या कार्याचे कौतुक करत त्यांना पुढील वाटचालीस शुभेच्छा दिल्या.
दरम्यान, सन्मान जाहीर होताच मनोहर बोभाटे यांच्यावर अभिनंदनाचा वर्षाव होत आहे. सामाजिक, राजकीय आणि पत्रकारिता क्षेत्रातील मान्यवरांकडून त्यांचे विशेष कौतुक करण्यात येत असून, त्यांच्या कार्याचा अभिमान व्यक्त केला जात आहे.
या सन्मानामुळे राळेगाव तालुक्याच्या नावलौकिकात भर पडली असून, तरुण पत्रकारांसाठीही मनोहर बोभाटे हे प्रेरणास्थान ठरत आहेत. भविष्यातही त्यांनी समाजहिताची भूमिका अधिक प्रभावीपणे निभवावी, अशी अपेक्षा सर्व स्तरातून व्यक्त होत आहे.
