यवतमाळ जिल्हा प्रतिनिधी रामभाऊ भोयर
चहांद, दि. ३० जून २०२६ : सोनामाता हायस्कूल, चहांद येथील लिपिक तथा शाळेचे कर्तव्यदक्ष कर्मचारी मा. राजेंद्र झोटिंग हे नियत वयोमानानुसार आज, दि. ३० जून २०२६ रोजी सेवेतून निवृत्त झाले. त्यांच्या प्रदीर्घ, प्रामाणिक व समर्पित सेवेला गौरविण्यासाठी शाळेच्या पटांगणात स्नेहपूर्ण वातावरणात भव्य सत्कार समारंभ आयोजित करण्यात आला.
या कार्यक्रमाच्या अध्यक्षस्थानी शाळेचे मुख्याध्यापक श्री. चिव्हाणे सर होते. यावेळी माजी मुख्याध्यापक धोबे सर, निवृत्त शिक्षक श्री. शिवणकर सर, कांबळे सर, गोवारदीपे मॅडम, गावंडे मॅडम, दांडेकर सर, सावंत सर, शिपाई प्रथमेश राऊत, देवानंद सोनोने, तसेच गावातील मान्यवर नागरिक कवडूजी सिडाम, दिलबर गवारकर आणि सुधीर घुगरे यांची प्रमुख उपस्थिती लाभली. कार्यक्रमास शाळेतील विद्यार्थी मोठ्या संख्येने उपस्थित होते.
कार्यक्रमाच्या प्रारंभी शाळेच्या वतीने मा. राजेंद्र झोटिंग यांचा शाल, श्रीफळ व पुष्पगुच्छ देऊन भावपूर्ण सत्कार करण्यात आला. त्यानंतर उपस्थित मान्यवरांनी आपल्या मनोगतातून राजेंद्र झोटिंग यांच्या प्रदीर्घ सेवाकाळातील प्रामाणिकपणा, कर्तव्यनिष्ठा, वेळेचे काटेकोर पालन, सहकार्याची भावना आणि विद्यार्थी व शिक्षकांप्रती असलेली आत्मीयता यांचा गौरव केला.
वक्त्यांनी आपल्या भाषणात त्यांच्या सामाजिक, राजकीय अतसेच शालेय क्षेत्रातील उल्लेखनीय कार्याचा आढावा घेत त्यांच्या योगदानाबद्दल कृतज्ञता व्यक्त केली. अनेक दशकांच्या सेवाकाळात त्यांनी शाळेच्या प्रगतीसाठी दिलेले योगदान सदैव स्मरणात राहील, अशा भावना यावेळी व्यक्त करण्यात आल्या.
सत्काराला उत्तर देताना मा. राजेंद्र झोटिंग यांनी आपल्या सेवाकाळातील आठवणींना उजाळा देत शाळेतील सर्व शिक्षक, कर्मचारी, विद्यार्थी व ग्रामस्थ यांनी वेळोवेळी दिलेल्या सहकार्याबद्दल मनःपूर्वक आभार व्यक्त केले. शाळेशी असलेले आपले नाते भविष्यातही कायम राहील, अशी भावना त्यांनी व्यक्त केली.
कार्यक्रमाचे प्रभावी सूत्रसंचालन श्री. सावंत सर यांनी केले, तर श्री. दांडेकर सर यांनी उपस्थितांचे आभार मानले. अत्यंत भावनिक आणि उत्साहपूर्ण वातावरणात हा सेवानिवृत्ती सत्कार समारंभ संपन्न झाला
