भोकरदन तालुक्यातील मौजे अण्वा येथे महाशिवरात्रीच्या दिवशी, 26 फेब्रुवारी 2025 रोजी कैलास गोविंद बोराडे या धनगर समाजाच्या तरुणावर अत्यंत अमानुष अत्याचाराची घटना घडली. गावातील काही व्यक्तींनी त्याला बोलावून घेतले, बेदम मारहाण केली आणि गरम सराईने शरीरात चटके दिले. विशेषतः, त्याच्या गुप्तांगावर खोलवर चटके दिले गेले, जे या क्रूरतेचे टोक आहे.

या घटनेची माहिती समोर आल्यानंतर समाज माध्यमांवर तीव्र संताप व्यक्त करण्यात येत असून, भटके विमुक्त विकास परिषद महाराष्ट्र प्रदेशने या प्रकाराचा तीव्र निषेध केला आहे. त्यांनी मुख्यमंत्री तथा गृहमंत्री मा. देवेंद्र फडणवीस यांना निवेदन पाठवून आरोपींवर कठोरात कठोर कारवाई करण्याची मागणी केली आहे.
संबंधित आरोपींना तात्काळ अटक करून मोक्का कायद्याअंतर्गत कठोर शिक्षा द्यावी.
पीडित कुटुंबाला आर्थिक मदत व तातडीने न्याय द्यावा.
भटके-विमुक्त समाजावर वाढत्या अत्याचारांच्या पार्श्वभूमीवर त्यांच्यासाठी विशेष अत्याचार प्रतिबंधक कायदा लागू करावा.
राज्य व जिल्हास्तरावर भटके-विमुक्त अत्याचार निवारण समिती स्थापन करावी.
भटके-विमुक्त समाजासाठी कायमस्वरूपी आयोग स्थापन करावा.
परिषदेकडून इशारा देण्यात आला आहे की, जर या मागण्यांची तातडीने दखल घेतली नाही, तर सरकारविरोधात तीव्र आंदोलन छेडले जाईल. मागील वर्षभरात परभणी, पुणे आणि इतर भागांमध्ये भटके-विमुक्त समाजावर झालेल्या अन्याय-अत्याचाराच्या घटनांचीही आठवण करून देत, सरकारने त्वरित पावले उचलावीत, अशी ठाम भूमिका परिषदने मांडली आहे. त्यावेळी तालुक्यातील
डॉक्टर कोकरे
सागर एबडवार
राहुल चव्हाण
रामेश्वर भिसे
भूपेंद्र कारिया, मेघश्याम चांदे सह भटके-विमुक्त परिषद व धनगर समाज मोठ्या प्रमाणात हजर होता.