सहसंपादक : रामभाऊ भोयर
वणी–यवतमाळ राज्य मार्ग क्रमांक ३१७ वर मार्डी गावातून जाणाऱ्या रस्त्याच्या बाजूला झालेल्या अतिक्रमणाबाबत सार्वजनिक बांधकाम विभागाने केलेल्या नोटिसा मनमानी पद्धतीच्या असल्याचा आरोप नागरिकांनी केला आहे. या कारवाईला कायदेशीर चौकट मिळावी, अशी मागणी नागरिकांनी आ. संजय देरकर यांच्यासह तहसीलदारांकडे निवेदनाद्वारे केली आहे.
सदर विभागाने ४ जून व १८ जुलै रोजी बजावलेल्या नोटिसांमध्ये रस्त्याच्या मधोमधून १५ मीटर अंतरातील अतिक्रमण हटविण्याचा उल्लेख होता. मात्र तिसऱ्या नोटिसेत हे १५ मीटर अंतर गाळून केवळ फुटपाथ, नाली व रस्त्याच्या कडेला असलेले अतिक्रमण हटविण्याचा उल्लेख करण्यात आल्याने गोंधळ निर्माण झाला आहे.
या विसंगतीमुळे नागरिकांमध्ये संतापाचे वातावरण असून, मनमानी व बोगस कारवाई थांबवून ती कायदेशीर चौकटीत करावी, अशी मागणी करण्यात आली आहे. तसेच अन्यथा या कारवाईमुळे उद्भवणाऱ्या परिणामास सार्वजनिक बांधकाम विभाग जाबदार राहील, असा इशाराही देण्यात आला आहे.
या निवेदनावर अविनाश भाजपाले, कृष्णा मांढरे, चंद्रशेखर काळे, हितेश गायधन, योगेश आखाडे, गौरव मांढरे, नामदेव मेंढे, अमित काकडे, धीरज हरबडे, संजय आसुटकर, चंद्रशेखर मडावी, विकास राणे, मनोज कनाके, दिनेश देऊळकर, राजू चौधरी, हितेश मांढरे, आशीष पारशिवे, रमजान पठाण, सुनील सोमटकर आदींच्या स्वाक्षऱ्या आहेत.
