सहसंपादक: रामभाऊ भोयर
केंद्र सरकारच्या आरोग्य व कुटुंब कल्याण मंत्रालया अंतर्गत तसेच महिला व बालकल्याण मंत्रालयाच्या संयुक्त विद्यमाने “ स्वस्थ नारी सशक्त परिवार” हे विशेष अभियान दिनांक १७ सप्टेंबर पासून ते ०२ ऑक्टोबर पर्यंत सर्व देशभरात राबविण्यात आले होते. त्यानुसार श्री. वसंतराव नाईक शासकीय वैद्यकीय महाविद्यालय व रुग्णालय यवतमाळ यांच्यामार्फत महाविद्यालयाचे अधिष्ठाता डॉ.अनिल बत्रा यांच्या मार्गदर्शनाखाली विविध ठिकाणी शिबिरांचे आयोजन करण्यात आले होते.
या अभियानाचा मुख्य उद्देश महिलांना व बालकांना उच्च गुणवत्तेच्या आरोग्य सुविधा देणे, आरोग्याबाबत जनजागृती करणे, आरोग्य सुधारणेत समाजाचा सक्रिय सहभाग घेणे हा होता. त्यानुसार वैद्यकीय महाविद्यालयाद्वारे आयोजित विविध शिबिरामध्ये महिलांमध्ये आढळणाऱ्या कॅन्सरच्या गाठी ची तपासणी, सर्वाइकल कॅन्सरची तपासणी, किशोरवयीन मुलीची आरोग्य तपासणी, गरोदरमाता, स्तनदामाता यांची आरोग्य तपासणी तसेच रुग्णांना पोषण आहाराविषयी माहिती देऊन, वैद्यकीय महाविद्यालयातील नेत्ररोग विभाग, बालरोग विभाग, स्त्रीरोग विभाग, औषधशास्त्र विभाग, डेंटिस्ट्री विभाग, त्वचारोग विभाग, अस्थिरोग विभाग या विभागातील डॉक्टरांच्या चमुने सहभाग घेऊन एकूण २२०४ रुग्णांची आरोग्य तपासणी करून उपचार केलेले आहेत. या शिबिराचे नोडल अधिकारी म्हणून डॉ. गजानन सोयाम, डॉ. फैजा खान तर समन्वयक म्हणून डॉ.महेश चव्हाण व डॉ. प्रसाद बनसोड हे होते.
या आरोग्य शिबिरास महाविद्यालयाचे वैद्यकीय अधीक्षक डॉ.सुरेंद्र भुयार, उप वैद्यकीय अधीक्षक डॉ.अमर सुरजुशे, डॉ.दुर्गेश देशमुख, वैद्यकीय अधिकारी डॉ.अरविंद कुळमेथे यांचे सहकार्य लाभले.
सदर आरोग्य शिबिरात महाविद्यालय रुग्णालय येथील विविध विभागातील तज्ञ डॉक्टर्स, कनिष्ठ निवासी, आंतरवासिता डॉक्टर्स व समाजसेवा अधीक्षक वैद्यकीय यांनी परिश्रम घेतले.
