सहसंपादक : रामभाऊ भोयर
इंदिरा गांधी कला महाविद्यालय, राळेगाव येथील बी.ए. प्रथम वर्षाचे विद्यार्थी अभिषेक बुटके व यश यादव यांनी कोलकाता येथे आयोजित प्रतिष्ठित ऑल इंडिया आंतरविद्यापीठ क्रीडा स्पर्धेत उल्लेखनीय कामगिरी करत महाविद्यालयाचा नावलौकिक वाढविला आहे. देशभरातील नामांकित विद्यापीठांच्या खेळाडूंमध्ये त्यांनी उत्कृष्ट खेळाचे प्रदर्शन करून आपली गुणवत्ता सिद्ध केली.
या अत्यंत स्पर्धात्मक सामन्यात त्यांनी एम.जी. (महात्मा गांधी) विद्यापीठ, कोट्टायम यांच्या बलाढ्य संघाचा पराभव करत संघासाठी महत्त्वपूर्ण यश संपादन केले. संघभावना, शिस्तबद्ध खेळ, रणनीती व आत्मविश्वास यांचा संगम साधत त्यांनी प्रभावी कामगिरी नोंदवली.
दरम्यान,देशातील क्रीडा संस्कृतीला चालना देण्यासाठी केंद्र सरकारतर्फे राबविण्यात येणाऱ्या “खेलो इंडिया” उपक्रमाला संत गाडगेबाबा अमरावती विद्यापीठ अमरावती चा फुटबॉल संघ पात्र ठरला आहे.
खेलो इंडिया अंतर्गत आयोजित विद्यापीठ स्पर्धांमध्ये फुटबॉल ही प्रमुख स्पर्धांपैकी एक असून देशभरातील संघ यात सहभाग घेतात व खेळाडूंना कौशल्य विकसित करण्याची संधी मिळते.
या उल्लेखनीय यशाबद्दल विद्यार्थ्यांचे माननीय माजी शालेय शिक्षण मंत्री मा. प्रा. वसंतराव पुरके सर, महाविद्यालयाचे प्राचार्य डॉ. अल्फ्रेड शेख, क्रीडा संचालक डॉ. किरण पवार, तसेच सर्व प्राध्यापकवर्ग, कर्मचारी, नॉन-टीचिंग स्टाफ व विद्यार्थ्यांनी मनःपूर्वक अभिनंदन केले आहे. त्यांनी विद्यार्थ्यांच्या उज्ज्वल भवितव्यासाठी शुभेच्छा व्यक्त केल्या.
या कामगिरीमुळे इंदिरा गांधी कला महाविद्यालयाची क्रीडा परंपरा अधिक भक्कम झाली असून ग्रामीण भागातील युवा खेळाडूंना प्रेरणा मिळत आहे. खेळाडूंच्या या यशामुळे महाविद्यालय व परिसरात अभिमानाचे वातावरण निर्माण झाले आहे.
