सहसंपादक : रामभाऊ भोयर
राळेगाव : स्थानिक कापड व्यावसायिक व सामाजिक कार्यात नेहमीच पुढाकार घेणारे संजय सुशीलाबेन बाळकृष्ण पोपट यांनी आपल्या वडिलांच्या स्मृतीप्रीत्यर्थ राळेगाव येथील मोक्षधाम परिसरात भव्य स्मृतीद्वार उभारून समाजाप्रती असलेली कृतज्ञता व्यक्त केली आहे. स्वर्गीय बाळकृष्ण गिरधरलाल पोपट यांच्या स्मरणार्थ उभारण्यात आलेले हे प्रवेशद्वार परिसराचे सौंदर्य वाढविण्यासोबतच भाविकांसाठीही मार्गदर्शक ठरणार आहे.
राळेगाव शहरातील मोक्षधाम परिसरात उभारण्यात आलेले हे स्मृतीद्वार साधे पण आकर्षक बांधकाम, सुबक रंगसंगती व स्पष्ट अक्षरांमुळे दूरूनच लक्ष वेधून घेत आहे. गावातील नागरिक, सामाजिक कार्यकर्ते तसेच अंत्यसंस्कारासाठी येणाऱ्या नागरिकांसाठी हे द्वार सोयीचे ठरणार असून परिसराला व्यवस्थित ओळख मिळाली आहे.संजय पोपट हे केवळ यशस्वी व्यापारी नसून विविध सामाजिक, धार्मिक व सार्वजनिक उपक्रमात नेहमीच सहकार्य करणारे म्हणून परिचित आहेत. गरजूंसाठी मदत, सार्वजनिक कार्यक्रमांना हातभार आणि गावाच्या विकासासाठी योगदान देणे ही त्यांची सातत्यपूर्ण भूमिका आहे. वडिलांच्या स्मृतीप्रीत्यर्थ उभारलेले हे द्वार त्यांच्या कुटुंबाच्या संस्कारांची साक्ष देणारे ठरले आहे.
या उपक्रमाबद्दल स्थानिक नागरिकांनी समाधान व्यक्त करत पोपट कुटुंबाचे कौतुक केले आहे. समाजातील प्रत्येकाने आपल्या पूर्वजांच्या स्मरणार्थ अशा प्रकारे सार्वजनिक उपक्रमात योगदान दिल्यास गावाच्या विकासाला नक्कीच चालना मिळेल, अशी भावना नागरिकांतून व्यक्त होत आहे.
