प्रतिनिधी:ऋषिकेश जवंजाळ, काटोल
तालुका प्रतिनिधी/१८ डिसेंबर
काटोल – क्रांतीज्योती सावित्रीबाई फुले जयंती दि.३ जानेवारी “महिला शिक्षण दिन” म्हणून साजरा होणार या राज्य शासनाच्या निर्णायाचे क्रांतीज्योती सावित्रीबाई फुले विचारमंच, काटोल कडून स्वागत करण्यात आलेले आहे अशी माहिती विचारमंचाच्या अध्यक्षा वैशालीताई डांगोरे व सचिव अँड.भैरवीताई टेकाडे यांनी निवेदनातून जाहीर केले.
महात्मा जोतीराव फुले आणि क्रांतीज्योती सावित्रीबाई फुले यांनी बहुजन समाजाला मुख्य प्रवाहात आणण्यासाठी आपले संपूर्ण जीवन वेचले आहे. देशातील महिलांसाठी महात्मा फुले यांनी पहिली शाळा सुरू केली आणि सावित्रीबाई यांनी स्वतः शिक्षण घेऊन महिलांना शिकवण्याचे काम केले. स्रियांना मुख्य प्रवाहात आणण्याचे काम सावित्रीबाई फुले आणि जोतीराव फुले यांनी केली आहे त्यामुळे सावित्रीबाई फुले यांच्याप्रती कृतज्ञता व्यक्त करण्यासाठी त्यांचा जन्मदिन ‘महिला शिक्षण दिन’ म्हणून साजरा करण्यात यावा अशी मागणी निवेदनाद्वारे अन्न, नागरी पुरवठा व ग्राहक संरक्षण मंत्री छगन भुजबळ यांनी मुख्यमंत्री उध्दव ठाकरे यांच्याकडे केली होती. यावेळी मुख्यमंत्री उद्धव ठाकरे यांनी निवेदन स्वीकारतानाच ही मागणी मान्य केली.
स्रियांना ‘चूल आणि मूल’ या परंपरेतील चार भिंतीच्या पलीकडे आणण्याचे काम सावित्रीबाई फुले यांनी केले आहे. त्या काळात सामाजिक बहिष्कार स्वीकारून प्रसंगी शेण व दगडधोंड्यांचा मार सहन करत त्यांनी मुलींना शिकवण्याचे ऐतिहासिक कार्य केले त्यामुळे त्यांचा जन्मदिन हा राज्यभरात ‘महिला शिक्षण दिन’ म्हणून साजरा करण्यात येणार आहे.त्यामुळे सावित्रीबाई फुले विचारमंच अध्यक्षा वैशाली डांगोरे, सचिव भैरवी टेकाडे, सुवर्णा पवार, प्रतिभा भेलकर, मोहना खरबडे,सुनिता कांबळे,रेखा वाघे,कविता कांडलकर, सोनाली तिजारे,कांचन टेंभे, अर्चना वरोकर, शितल चर्जन, भावना मालपे, सविता उमप,मोनाली पवार, रजनी नेरकर, सोनाली बोढाळे,शिल्पा बोढाळे आदींनी राज्यातील शासनाचे आभार मानले.
